Читать книгу Mi Revalueshanary Fren - Linton Kwesi Johnson - Страница 8

YOUT SCENE

last satdey

I nevah deh pan no faam,

so I decide fi tek a walk

doun a Brixton

an see wha gwaan.

di bredrin dem stan-up

outside a Hip City,

as usual, a look pretty;

dem a lawf big lawf

dem a talk dread talk

dem a shuv an shuffle dem feet,

soakin in di sweet musical beat.

but when nite come

policeman run dem dung;

beat dem dung a grung,

kick dem ass,

sen dem paas justice

to prison walls of gloom.

but di breddah dem a scank;

dem naw rab bank;

is pakit dem a pick

an is woman dem a lick

an is run dem a run when di wicked come.