Читать книгу Mi Revalueshanary Fren - Linton Kwesi Johnson - Страница 9

DOUBLE SCANK

I woz jus about fi move fahwod,

tek a walk tru di markit,

an sus di satdey scene—

yu know whe a mean—

when I site breddah Buzza

bappin in style

comin doun FRONT LINE.

him site a likkle sistah

him move fi pull a scank

but she soon sus him out

seh him dont in her rank;

soh when shame reach him,

him pap a smile,

scratch him chin,

but di sistah couda si tru him grin:

breddah Buzza coudn do a single ting.

“Hail, Buzza!” I greet him.

“Love!” him greet I back.

“I a look a money, Buzza;

come fahwod wid some dunny.”

di breddah seh him bruk

him seh him naw wok

him seh him woman a breed

him seh him don’t even hav a stick a weed.

but I site diffrant:

di bookie man jus done tek him fi a ride!