Читать книгу Deutsche Humoristen, 4. und 5. Band (von 8) - Various - Страница 8

Vor jaren wont in einem walt

ein waltbruder, an jaren alt,

der sich der wurzeln neren tet;

derselb ein jungen sune het,

in dem alter bei zweinzig jarn,

der war einfeltig, unerfarn,

der fragt den alten: sag doch mir,

sint in dem walt gewachsen wir?

wan er nie menschen het gesehen.

der alt tet zu dem jungen gehen:

mein sun, da du noch warest klein,

hab ich dich geflehet2 herein

aus der arglisting, bösen welt,

das sie uns nit schmech, spott und schelt,

weil ir gar niemant recht kan tan,

sie schlag im doch ein blechlein an3.

still schwig der sun, doch tag und nacht

des vatters red stets nachgedacht,

was doch die welt nur möcht gesein4.

zu letzt da wolt er ie darein,

legt an den vatter große bit,

der es doch lang zeit widerriet;

zu letzt er überredet wart

und macht sich mit im auf die fart,

und fürten iren esel mit

ledig, ir keiner darauf rit.

im walt bekam5 in ein kriegsman,

der sprach: wie laßt ir ledig gan

den faulen esel hie allein?

Ir dunkt mich nit fast witzig sein,

das euer keiner darauf reit.

als sie nun von im kamen weit,

der vatter sprach: mein sun, sich zu,

wie uns die welt empfangen tu.

der sun sprach: laß mich darauf reiten.

das gschach, da kam zu in von weiten

ein altes weib neben die ecker,

die sprach: secht zu dem jungen lecker,

der reit, und der alt schwache man

muß hindennach zu füßen gan!

sun, sprach der alt, glaubst du nun mir,

was von der welt ich saget dir?

er sprach: laß uns versuchen baß.

der jung balt von dem esel saß,

und saß der alt balt auf für6 in,

reit also fuß für fuß dahin.

in dem begegnet in ein bauer,

der redt sie an mit worten sauer:

secht an den alten groben lappen,

leßt den jungen im kot her sappen7,

dem nöter wer zu reiten dan im.

der alte sprach: mein sun, vernim,

das man der welt nit recht mag tun.

der sun sprach: vatter, laß mich nun

aufsitzen, das wir reiten bed,

schau, ob die welt dahzu auch red.

aufsaß er und ritten dahin;

da kam ein bettelman zu in,

tet an einr wegscheid auf sie harrn

und sprach: secht an die großen narrn,

wöllen den esel gar erdrücken!

der vatter sprach: in allen stücken

tut uns die welt mit hönwort schmitzen8.

der sun sprach: laß uns beid absitzen,

so wöllen wir den esel tragen,

was nun die welt darzu wil sagen.

absaßen sie, den esel trugen

und mit im übers felt hinzugen,

das von in beiden ran der schweis.

ein edelman kam zu der reis,

tet sie all beid mit worten straffen:

wann her9, wannen her, ir schlauraffen,

das ir das hinder kert herfür10?

der vatter sprach: mein sun, hie spür,

das an der welt ist gar verlorn11.

da sprach der sun in großem zorn:

den esel wöllen wir erschlagen,

denn hat die welt nit mehr zu klagen.

den esel schlugen sie zu haufen;

da kam ein jäger zugelaufen,

der schrei: o ihr großen fantasten,

des esels gneußet ir am basten

lebend, tot ist er euch kein nütz.

zuhant der junge wart urdrütz12

der welt, die in mit spot und straf

so gar an allen orten traf,

sprach: hat die welt auf einen tag

über uns balt so vil der klag,

solt wir denn all tag darin bleiben,

was wunders würt sie mit uns treiben!

und keret mit dem alten dar

in walt, daraus er kommen war.