Читать книгу Бер көйрәтик, гомер = Давай поговорим, жизнь - Зөлфәт - Страница 5

Ерак бабайлардан килгән тамга,

Безнең тамга – нәсел тамгабыз...

Әткәемә килеп ирешкән ул...

Нәсел тере! Исән калганбыз!

Ул тамганы әткәй,

     өй салганда,

Балта белән чапты нигезгә. –

Хәтерләп кал, улым, бу тамганы

Һәм яман сүз аңа тигезмә!

Бу тамгада –

     адәм, фикер, очыш...

Шулар һич тә туктап калмасын!

Тапшыра күр, берүк, оныкларга –

Бу тамганы сулар агызмасын,

Бу тамганы утлар алмасын!

Сукбай каны түгел –

     тамырында

Борынгыдан килгән кан яна! –

Синең өчен нәсел кызармасын,

Син дан өстә шушы тамгага!