Читать книгу Liefde is ’n sprokie - Fynbosskrywers - Страница 7

Bungee-sprong van die skarlakenmeisie

17 APRIL • BLOU VRYDAG

Ek haat my lewe! Hoekom kan ek nie soos normale kinders lyk nie?

Gloria het my weer verneder. Hierdie keer voor die HELE skool. Hoe kan mense van haar hou? Regtig! ’n Mens het nie ’n 3D-bril nodig om deur haar skynheiligheid te sien nie.

Vanoggend met saalbyeenkoms blah-blah-blah sy op die verhoog oor ’n geldinsameling-ding waarby sy betrokke was. Sonder om te blik of te bloos sê sy met daai aangeplakte stroopstemmetjie van haar: “Miskien kan ons selfs volgende keer ’n fondsinsameling vir Alana hou. Dan kan sy dalk iets aan haar gesig laat doen.” Paul en Jaco wat agter my gesit het, het kliphard gelag. Ek kon hoor hoe Jaco vir Paul sê: “Asof iemand geld gaan insamel vir ’n sirkus-freak.”

Sulke goed behoort my nie meer te ontstel nie, maar dit maak baie, baie seer.

NOTA AAN SELF: Moet nooit weer jou voet by jou kamerdeur uit sit nie. Die wêreld daar buite is nie vir mense soos jy nie.

18 APRIL • SATERDAG

Heeloggend skaak gespeel. Ek is nou tweede in my kategorie op Chessmasters.com. Whoop! Whoop! Nou moet ek nog net vir Checkm8 wen. Die ou (meisie?) is baie goed.

Marianna was vanmiddag hier. Malkop BFF. Ek het so gelag. Sy’t daai foto van Gloria, waar sy besig is om ’n puisie uit te druk, op haar Facebook-blad gesit. Gloria was briesend. Die boodskap wat sy vir Marianna op haar selfoon gelos het … Nie eens rugbykykers vloek so nie.

Natuurlik het sy haarself un-tag, maar nie voor sewe-en-dertig mense kommentaar gelewer het nie. Dit is seker kinderagtig, maar ek kon nie help om ’n klein bietjie lekker te kry nie.

Marianna is great (al is sy weird). Ek wonder hoe my lewe sou gewees het as sy nie in graad vier na ons skool toe gekom het nie? Dit sou aaklig wees om die enigste outcast in die skool te wees.

20 APRIL • MAANDAG

Ek kan nie glo meneer Swanepoel dwing al die graadneges om Vrydagaand aan die talentkompetisie deel te neem nie. Dis só wreed! Ek wil nie! Mense staar genoeg na my, ek het nie ’n verhoog nodig nie! Vandag by die Spar het ’n vrou haar sak met kruideniersware laat val toe sy my gesig sien. Ma sê ek moet my nie aan mense steur nie. Dis vrek moeilik.

Ek moet net uit hierdie konsert kom!

PS. Marianna gaan soos Dracula aantrek en ’n stuk uit Shakespeare voorlees. Ha-ha. Sy voel ’n veer. Wens ek het haar guts gehad.

21 APRIL • DINSDAG

Alana, jy KAN dit doen. Tyd dat jy opstaan teen Gloria. Die vermetelheid. Pouse kom sy en haar groepie Glorianers daar aan: “So waarmee gaan jý ons Vrydagaand vermaak, Alana? Ek hoop jy probeer weer sing. Laat weet net as jy my nuwe onderlaag wil leen.”

Sy is só fake. Ek het gedink Marianna gaan haar met die vuis slaan (sy is klaar in die moeilikheid omdat sy laas week vir Jaco met die papiervampier – haar woord vir ’n krammasjientjie – gegooi het toe hy my Rudolph, the red faced reindeer, genoem het).

Die giggelende Glorianers met hulle mascara-wimpers en lip gloss-lippe het my net laat snap. Ek kon dit net nie meer inhou nie. Ek het iets gesê soos: “Baie dankie, maar nee dankie, Gloria. Ek het nie stopverf nodig om my krake toe te smeer nie. En as ek reg onthou, het die eisteddfod-beoordelaars in graad twee my sang bo joune verkies. Wees reg om Vrydag verneder te word.”

Dis ’n gevoelige saak vir haar, want ek weet sy neem sedert daai eisteddfod peperduur sanglesse. Sy het net gesnork en omgedraai, die trossie Glorianers soos eendjies agterna. Marianna het my so hard op my skouer geklop, ek het ’n blou kol.

Wat het my besiel? Wat gaan ek sing? In graad twee was dit anders. Toe het ek nog nie van beter geweet nie.

PS. Ek het vanoggend uiteindelik vir Checkm8 gewen. Yeaah! Sy boodskap aan my op Chessmasters Chat:

CHECKM8:Patito, well done, bro.

Ha-ha-ha, hy dink ek’s ’n ou.

25 APRIL • SATERDAG

Gloria het gewen. Uuugh. Nooit gedink ek sal dit hoef te sê nie. Marianna het gisteraand ge-WhatsApp met die nuus. Sy is vies vir my. Ek kan dit verstaan, sy’s teleurgesteld omdat ek nie opgedaag het nie. Ek het vir Ma gesê my kop pyn, ek kan nie gaan nie. Sy weet ek het gejok. Ek haat dit om mense teleur te stel.

Ek wou gaan – ek het tot in die stort geoefen, for goodness sake! As ek baie eerlik moet wees, ek sing nie sleg nie. Ek weet ek kon beter as Gloria doen. Maar hoe kon ek na wat gister in die bus gebeur het?

Een sitplek oop. Langs een van die matriekseuns. Ek gaan sit, hy staan op en gaan sit op een van sy buddies se skoot agter in die bus. Almal lag. Dit was so embarrassing. Ek wil sterk wees, maar sulke goed laat my twyfel. Laat Gloria maar eerder wen, in haar gloria in.

PS. Checkm8 het vir my ’n boodskap gestuur: Hey bro, is jy reg om weer my wit koning se gat te skop? Hoe lyk dit met ’n rematch?

Sal hom later antwoord.

27 APRIL • MAANDAG

Die beste nuus ooit! Oor twee jaar het ek dalk ’n nuwe gesig. Ma het die geld vir my behandeling herbelê by ’n ander finansiële ou. Hy sê daar sal oor twee jaar genoeg geld wees om dit te laat doen. Ma en Pa spaar al van my geboorte af. Selfs ná Pa se dood het ons raap en skraap geleef sodat sy kon spaar. Dis nie fair nie. Alles oor hierdie aaklige gesig van my.

Scarface. Cherrietert. Tamatiegesig. Scarlet Girl … Hoekom moes ek met ’n geboortevlek gebore word? Beauty aan die linkerkant en Beast aan die regterkant, met die vieslike opgehewe rooi vlek oor my voorkop, oog, wang en ken. Port-wine stain, noem hulle dit.

Toe ek klein was het dit my nie eintlik gepla nie. Ek het baie maatjies gehad. Mense het toe ook gestaar, maar in my onskuld het ek Ma geglo: “Alana, moet jou nie aan mense steur nie, hulle kyk na jou omdat Liewe Jesus jou gekies het om Sy liefdesbloed oor uit te stort. Hulle is net jaloers.” Ek onthou ek het geglimlag wanneer mense vir my kyk en hulle selfs jammer gekry omdat hulle nie uitverkies was nie. Hoe naïef!

In graad drie het alles verander. Juffrou Peters het Jaco Lategan, ’n nuwe seun, aan ons voorgestel en gesê hy moet langs my sit. Ek sal nooit vergeet wat hy gesê het nie: “Ek gaan nie langs daai freak sit nie, netnou steek sy my aan.” Almal het gelag en na my gekyk asof hulle my vir die eerste keer sien.

Daarna wou minder kinders pouses met my speel. Soms is ek nog na ’n partytjie genooi, maar ek het nie meer gegaan nie. Dit was baie erg, ek het later ook my netbal en my kooroefeninge (waaroor ek MAL was) gestop. Dis toe dat ek begin skaak speel het op Pa se rekenaar. Van niks anders hê om te doen nie.

Oukei, Alana, genoeg gewroeg. Gaan slaap. Oor twee jaar het jy ’n nuwe gesig. Ek wonder hoe dit gaan voel om normaal te wees?

2 MEI • SATERDAG

Groot nuus! Checkm8 se naam is Alexander en hy is wonderlik. Ek het hom weer gewen en ons het vir ure daarna in die Chatroom gesels. Hy is snaaks, filosofies, interessant; so anders as die kinderagtige ouens in my skool. Dis al ná twaalf. So Copy. Paste. Slaap. Wil vir altyd ons heel eerste gesprek onthou:

CHECKM8:Jo bro, Patito, jy kook. Speel jy professioneel?

PATITO:In my dreams, ja.

CHECKM8:Wat doen jy as jy nie speel nie? Rugby? Krieket?

PATITO:Het probeer, maar ons skool het hierdie ding teen dogters wat wil speel. Baie seksisties, nè?

CHECKM8:Jy’s ’n girl! OMW! ’n Girl het my gat geskop. Jammer vir my seksistiese aanname. Ek gaan gou op die treinspoor speel, verskoon my. Bloosgesig.

PATITO:LOL, jy’s verskoon. Klim van die spoor af, dis gevaarlik.

CHECKM8:So netbal, ballet of hokkie as jy nie seksistiese ouens se gatte skop met skaak nie?

PATITO:None of the above. Ek hou van sing.

CHECKM8:Cool. Self mal oor musiek. Ek en 4 skoolbuddies het ’n band. Ek is die keyboard-ou. Ooit opgetree?

PATITO:Het. Nie meer. Let’s not go there.

CHECKM8:Ouch. Jammer om te hoor. Moenie worry nie, ons band kom ook nie verder as die garage nie. Weet jy van Musiekbefonkers op fb? Baie nice groep vir closet musikante soos ons.

PATITO:Nee tx, sal kyk.

CHECKM8:G2G. Prefekvergadering. Sou eerder met jou wou chat. Sug. CU l8er Patitog8er.

PATITO:Adios, checking out mate.

CHECKM8:LOL, môre sit ek jou in skaakmat!

Checkm8 logged off.

Chekm8 logged on.

CHECKM8:So wat is jou naam?

PATITO:Jy gaan laat wees vir jou vergadering! Alana.

CHECKM8:Aangename kennis, Alana – baie gepas. Dit beteken beautiful, het jy geweet? Ek is seker jy is. Cheers. Alexander.

Checkm8 logged off.

4 MEI • MAANDAG

Ek kan nie glo Marianna het dit gedoen nie! Vanoggend was sy soos die Spanish Inquisition toe ek haar vertel van Alexander.

“Screen naam?” vra sy.

“Checkm8.”

“Van?”

“Le Seur.”

“Waar bly hy?”

“Êrens in Gauteng, ek gaan hom nie vra waar nie, netnou klink ek soos ’n stalker.”

“Watter graad?”

“Weet nie, dalk elf.”

Nou weet ek hoekom. So pas ’n e-pos van haar gekry met al die ins en outs van Alexander le Seur. Prestasies: prefek, skaakspankaptein en B-span krieket. Skool: Prince George Privaatskool, Pretoria. Ouderdom: sestien jaar, drie maande … Als behalwe sy skoengrootte.

OMW, toe maak ek die attachments oop. Foto’s waar hy rugby speel (hy is lank en atleties gebou), by ’n swembad (hy’t ’n sixpack soos ’n eierboks), in sy skoolklere (selfs dít laat hy rock), ’n close-up (bruin, krullerige hare met teddiebeer-oë en lagkuiltjies). Kan nie ophou kyk nie, alles aan hom is so perfek. Marianna het onder die e-pos ’n thumbs-up teken gemaak met: All clear. Van jou BFF-FBI-agent.

Sy’s die beste!

11 MEI • MAANDAG

Ek en Alexander chat elke dag so baie, ek kry nie eens tyd vir my dagboek nie. Vanoggend wakker geword met dié boodskap: Môre, sleeping beauty, hoop jy’t ’n awesome dag. X0X

Nooit geweet my hart kan so vinnig klop nie.

Marianna dink ek is verlief. Miskien is ek. Ma het ook al gevra hoekom ek so gelukkig lyk. Moet bieg, selfs Gloria se aanmerkings ontstel my nie meer nie. Dit maak my bang.

Alexander sal een of ander tyd uitvind. Wat dan? Hy wou al klaar weet hoekom daar nie foto’s van my op Facebook is nie. Ek het net gesê ek is nie groot op selfies nie. Een of ander tyd sal ek vir hom moet sê …

15 MEI • VRYDAG

Soveel gemengde gevoelens, weet nie wat om te doen nie.

CHECKM8:Het jy die challenge op fb gesien? Al die closet musikante word gedare om ’n video van hulleself op YouTube te laai. Ek en die band gaan. Neem deel, toe? Sal jou graag wil hoor sing (en sien, Patitog8er).

PATITO:Miskien wil jy eerder nie. Miskien klink ek soos ’n koei wat kalf? Miskien hou ek die Guinness World Record vir die lelikste mens op aarde?

CHECKM8:My liewe Patito, as ek ’n ster gehad het vir elke oomblik wat jy my dag ophelder, sou ek nou al ’n galaxy in my hand gehad het. Al sing jy soos ’n koei en al lyk jy soos ’n klip, sal niks verander nie. Neem deel. Wat kan jy verloor?

PATITO:Sal daaroor dink. OK?

CHECKM8:K. Sweet dreams.

18 MEI • MAANDAG

Groot fout. Vir Marianna gesê van die YouTube challenge. Sy het die sangjuffrou gaan vertel. Hulle dring aan ek moet dit doen. Nooit geweet hoekom nie, maar die sangjuffrou karring al aan my om te sing vandat ek in die hoërskool gekom het.

Nou weet ek; sy was blykbaar by my graad twee eisteddfod en glo ek het ’n “uitsonderlike gawe”. Miskien moet ek dit net doen. Ek is moeg daarvoor om weg te kruip. Miskien is dit tyd om myself in die leeukuil te gooi en die ergste te laat gebeur. Dan kan ek aangaan met my lewe – sonder Alexander. Ek wil nie eens daaraan dink nie.

PATITO:OK, ek gaan bungee. Sal jy my vang?

CHECKM8:Vir jou Patito, enigiets. As jy ’n klip is, moet net nie op my kop land nie.Laat weet wanneer jy die video post. Kan nie wag om dit/jou te sien nie.

22 MEI • VRYDAG

Môreaand neem ons die video op. Ek is reg hiervoor. Oefen al heel week ná skool saam met die sangjuffrou. Sy is in vervoering oor my stem. Marianna gaan die videokamera beman en het gevra of sy my gesig kan afneem? Ek het ja gesê. Hopelik is daar nie baie mense wat na die video kyk nie. Alexander gaan dit sien. Ek wil hê hy moet, want ek is hopeloos verlief op hom. Tyd dat ek terugkom aarde toe voor ek heeltemal my hart verloor. Wie weet, dalk verras hy my?

PS. Wishful thinking, Alana

23 MEI • SATERDAG

Wat ’n aaklige dag! Ma huil al heeldag. Die man wat die geld vir die behandeling belê het, is weg met al die geld. Al haar opofferinge was verniet. Alles MY skuld.

Nie eens kans gehad om haar te vertel van die YouTube clip wat ons vanmiddag gepost het nie (so much vir die verrassing). Dis dalk beter so. Ek gaan dat Marianna dit vanaand afhaal. Wil nie nog ’n verdere verleentheid skep nie. Stupid, Alana. Stupid! Stupid!

13 JUNIE • SATERDAG

Ek kan nie glo hoe dinge verander het sedert ek drie weke gelede in my dagboek getik het nie. Ma het vandag my laptop hospitaal toe gebring. Ek onthou ek was op pad na Marianna toe. Daar was skerp ligte en die geraas van ’n toeter en remme op teer. Verder onthou ek niks.

Ek was twee weke lank in ’n koma. Glo ’n wonderwerk dat ek lewe, volgens die dokters. Ek is fine, behalwe vir ’n gebreekte been en die wit verband om my kop.

Toe Marianna my van die ander wonderwerk vertel, wou ek haar nie glo nie. Ons YouTube video het viral gegaan. Dit het al oor die 200 000 views! Daar is joernaliste wat onderhoude met my wil voer; selfs mense van ’n TV-stasie oorsee. En hordes boodskappe van mense wat vertel hoe ’n groot inspirasie ek vir hulle is, ook van die kinders by my skool (Gloria skitter natuurlik in haar afwesigheid ). Blykbaar trend #loveyourmarkAlana al vir meer as ’n week op Twitter. Ma sê ’n man van ’n platemaatskappy het gebel om te hoor wanneer hy my kan sien. WOW!

Geen boodskap van Alexander nie. My hart is seerder as my stukkende lyf.

18 JUNIE • WOENSDAG

Uiteindelik in my eie bed. Wat ’n dag! Dit was ’n gedoente toe ek vanmiddag uit die hospitaal kom. Oral kameras, verslaggewers en fotograwe. Ma en Marianna het soos lyfwagte vir my ’n pad oopgestoei kar toe. Maar dit was niks teen die verrassing by die huis nie!

Toe ons stilhou, sien ek hom. In die voordeur, met ’n bos sonneblomme in sy hand. ’n Yslike Colgate-smile op sy super-aantreklike bakkies. Alexander. OMW! Ek was in skok, my hart het amper gaan staan. Ek kon nie beweeg nie. Ma sê hy het elke dag gebel, vandat die berig oor my ongeluk in die koerant verskyn het. Hy het glo eergister al afgevlieg, vir ingeval ek vroeg ontslaan word. (Nota: onthou om hom môre te vra hoe hy dit aan sy skool/ouers verduidelik het).

Hy het die kar se deur oopgemaak en afgebuk, ek kon sy naskeermiddel ruik. “Alana, jy’t gebungee voor ek reg was! Sê asseblief volgende keer een, twee, drie voor jy spring.” Sy oë was sag en mooi en daar was diep kuiltjies om sy mondhoeke. Toe steek hy sy hand na my uit. “Sal jy asseblief hierdie vir my vashou terwyl ek terugstap na jou huis toe?” Sy hand was groot en warm om myne.

“Vir jou, Alexander, enigiets.”