Читать книгу Horace: Odes and Epodes - Гораций, Квинт Гораций Флакк - Страница 4

CARMINUM
LIBER PRIMUS
IV

Оглавление

Solvitur acris hiems grata vice veris et Favoni,

  Trahuntque siccas machinae carinas,

Ac neque iam stabulis gaudet pecus aut arator igni,

  Nec prata canis albicant pruinis.

Iam Cytherea choros ducit Venus imminente luna, 5

  Iunctaeque Nymphis Gratiae decentes

Alterno terram quatiunt pede, dum gravis Cyclopum

  Volcanus ardens urit officinas.

Nunc decet aut viridi nitidum caput impedire myrto

  Aut flore terrae quem ferunt solutae; 10

Nunc et in umbrosis Fauno decet immolare lucis,

  Seu poscat agna sive malit haedo.

Pallida mors aequo pulsat pede pauperum tabernas

  Regumque turris. O beate Sesti,

Vitae summa brevis spem nos vetat incohare longam. 15

  Iam te premet nox, fabulaeque Manes,

Et domus exilis Plutonia; quo simul mearis,

  Nec regna vini sortiere talis

Nec tenerum Lycidan mirabere, quo calet iuventus

  Nunc omnis et mox virgines tepebunt. 20


Horace: Odes and Epodes

Подняться наверх