Читать книгу Horace: Odes and Epodes - Гораций, Квинт Гораций Флакк - Страница 6

CARMINUM
LIBER PRIMUS
VI

Оглавление

Scriberis Vario fortis et hostium

Victor Maeonii carminis alite,

Quam rem cumque ferox navibus aut equis

  Miles te duce gesserit.


Nos, Agrippa, neque haec dicere nec gravem 5

Pelidae stomachum cedere nescii

Nec cursus duplicis per mare Ulixei

  Nec saevam Pelopis domum


Conamur, tenues grandia, dum pudor

Imbellisque lyrae Musa potens vetat 10

Laudes egregii Caesaris et tuas

  Culpa deterere ingeni.


Quis Martem tunica tectum adamantina

Digne scripserit, aut pulvere Troico

Nigrum Merionen, aut ope Palladis 15

  Tydiden superis parem?


Nos convivia, nos proelia virginum

Sectis in iuvenes unguibus acrium

Cantamus vacui, sive quid urimur,

  Non praeter solitum leves. 20


Horace: Odes and Epodes

Подняться наверх