Читать книгу Horace: Odes and Epodes - Гораций, Квинт Гораций Флакк - Страница 8

Lydia, dic, per omnis

  Te deos oro, Sybarin cur properes amando

Perdere; cur apricum

  Oderit campum, patiens pulveris atque solis?

Cur neque militaris 5

  Inter aequalis equitat, Gallica nec lupatis

Temperat ora frenis?

  Cur timet flavum Tiberim tangere? Cur olivum

Sanguine viperino

  Cautius vitat, neque iam livida gestat armis 10

Bracchia, saepe disco,

  Saepe trans finem iaculo nobilis expedito?

Quid latet, ut marinae

  Filium dicunt Thetidis sub lacrimosa Troiae

Funera, ne virilis 15

  Cultus in caedem et Lycias proriperet catervas?