Читать книгу Das kleine Glück - Helmut Zöpfl - Страница 14

Bal a Sportler aufm Zahnfleisch scho lauft,

bal oana beim Bergsteign wiara Dampflok scho schnauft

und er glaubt, daß er’s einfach nimmer ganz schafft,

weil eahm kurz vorm Zui grad ausgeht sei Kraft,

wenn’s oan draußn aufm Oktoberfest

beim Lukasschlagn fehlt bis auf an Rest,

daß er’n net aufebringt soweit, bis’ kracht,

wenn oana den neunzehnten Klimmzug grad macht,

und er’s gern auf zwanzge bringa möcht,

wenn oana scho moant, es geht nimmer recht,

es fehlt bloß no a Zipferl, a Batzerl a kloans,

a Tüpferl, a Bröckerl, na huift dir grad oans:

Oa Wörterl gibt’s, wennst as laut gnua bloß schreist,

des weckt bei uns Bayern an besonderen Geist.

Da spürst as in dir, und es wachst dir a Schmalz,

es gibt dir an Riß, an Ruck und dann knallt’s.

Da brauchst koane Spritzn, koan Dopingskandal.

des Wörterl alloa wirkt phänomenal.

Es is wia vom Zauberwasserl a Schluck.

Des Wort, des i moan, hoaßt einfach H a u r u c k.