Читать книгу Lot se vrou - Joan Hambidge - Страница 9

Waaroor sou hierdie grysaards praat?

Die een druk ’n vinger op ’n passasie

en as dit Petrus was, in gesprek met Paulus,

soos kunshistorici meen, het ons hier

Paulus na regs, wat die draaipunt sal verdedig,

teenoor die twyfelende, weifelende Petrus.

Daar word groot gewag gemaak van die chiaroscuro,

die ritmiese visuele harmonie, die dramatiese intensiteit

van die meester se uitsonderlike periode in Leiden.

Die besonderhede van boeke, doek en kerslig.

Of is dit skilder self in tweegesprek, ego en alterego?

Kunstenaar én mens? Twyfelaar én gelowig?

En, en; eerder as of, of? Wie sou hierop lig

kon werp? Die ewige spel tussen skilder en dig?