Читать книгу АСАРЛАР ТЎПЛАМИ (3-жилд) - - Страница 33

Ҳаёт катта йўлга ўхшайди,

Айланади бир умр йўллар.

Уфқларга умид тўшайди

Темир йўллар, бу темир йўллар.

Қайга элтди пахтаю донин

Шунча йиллар, у темир йиллар?

Юксалтирар ўзбекнинг шонин

Темир йўллар, бу темир йўллар.

Кўприклар ҳам дилларга ўхшар,

Эл қалбидай дарёлар, кўллар.

Тилакларга, йилларга ўхшар

Темир йўллар, бу темир йўллар.

Бир зумгина чайқалиб қолди

Ота макон – қирларим, чўллар.

Осмонларни ёнига олди

Темир йўллар, бу темир йўллар.

Сизни ҳасад нечун маҳв этар,

Кўмир диллар, эҳ кўмир диллар?

Ниятларни манзилга элтар

Темир йўллар, бу темир йўллар.

Дунё гоҳо бизга қайрилмай,

Эзгуликни тиллога пуллар.

Ор-номусдай кетар айрилмай

Темир йўллар, бу темир йўллар.

Ким қад тиклаб оламга боқди,

Бағри тўла орзулар, гуллар.

Мақсадларга чечаклар тақди

Темир йўллар, бу темир йўллар.

Ҳар манзил – бир тенгсиз жаҳондир,

Ўтаверар бу умр – йўллар.

Мангуликка қадар равондир

Темир йўллар, бу темир йўллар.