Читать книгу Ek en jy verskil hemelsbreed - Louise van Coller - Страница 9

Ons verskillende persoonlikhede

What counts in making a happy marriage is not so much how compatible you are, but how you deal with incompatibility.

– Leo Tolstoy

As ons na die huwelik kyk, bestaan dit uit die twee kompo­nente: man en vrou. Daarin lê reeds groot geslagtelike ver­skille opgesluit. Voeg nou nog die jare lange wanopvattings by van die rolle wat elkeen behoort te speel, plus twee kopstamp-verskillende persoonlikhede met verskillende behoeftes, en dit spel waarskynlik oorlog!

Waar mense nie hierdie verskille wil insien, leer aanvaar en respekteer nie, skep dit dikwels rampspoedige gevolge. Die grootste gevaar wat paartjies kan loop, is om onrealistiese ver­wag­tings van mekaar te koester, gegrond op hul eie persepsie van wie hulle is, en wat hulle van hul maat verwag. Deur hierdie konsep te huldig hou jy basies ’n mens soos ’n handpop aan ’n lyntjie en raak jy keer op keer teleurgesteld as die handpop nie maak soos hy of sy “moet” nie. Dan tree die ek-teen-jou-uitgangspunt in werking en mense sien mekaar as opponente, wat dan natuurlik tot die een of ander vorm van konflik-ontplof­fing sal lei. Die oomblik dat twee mense besef dat die enigste doeltreffende oplossing “ons twee saam teen die probleem” is, beweeg hulle progressief vorentoe en hou die vernietiging van mekaar eindelik op!

Die probleem in vandag se samelewing is egter dat paartjies nie voorbereid is op die huwelik nie, nie hul ware identiteit ken nie en glo die liefde sal alles bedek. Die illusie lê grotendeels daarin opgesluit dat kinders nie hiervoor opgelei en voorberei word nie. Juis daarom is voorhuwelikse berading van groot belang om toegerus te word vir wat voorlê in jul huwelik. Geen verhouding waar twee mense wat geslagtelik van mekaar verskil en uit verskillende opvoedkundige agtergronde kom, kan gemaklik en foutloos bestaan sonder dat konflik iewers kop uitsteek nie.

Dit is ’n gegewe feit dat konflik hier is om te bly. Gelukkig kan die effektiewe hantering daarvan aangeleer word, waar mense bereid is om te leer en deelname in te stem. In teorie lyk dit dikwels makliker as in die praktyk en mense gooi maklik tou op waar dit na werk lyk. Dan probeer hulle konflikvermyding, wat selfs tot erger gevolge as aanhoudende konflik kan lei.

Waar paartjies voorhuwelikse berading kry en doelbewus van hierdie verskille bewus gemaak word deur persoonlik­heids­analise, spaar hulle hulself groot konflik en jare se gegriefdheid. Dit is waarlik moontlik om saam met hierdie verskille aan me­kaar se vereistes te voldoen. Dit moet egter van albei kante kom en binne die raamwerk van respek vir mekaar as persoon wees. Ek het al dikwels die voorreg gehad om te sien waar hierdie kennis en die toepassing daarvan ’n totale ommeswaai van mense se gedrag teenoor mekaar teweegbring en huwelike so gered is.

Dit is egter net so belangrik om die seun en dogter reeds van kleintyd af hierop voor te berei deur mentorskap en ’n standvastige voorbeeld te stel as ouerpaar. Mentorskap bied soveel meer as net direkte dissipline en bou ’n kameraadskap wat vir jare nog staande sal bly. Dit is in verhoudings soos hierdie waar kinders hul ouers genoeg vertrou om alles te deel en selfs die moeilikste van vraagstukke te opper, omdat ’n grondslag van vertroue en integriteit lank reeds vasgelê is.

Met hierdie hoofstuk is dit my doelwit om jou bewus te maak van die verskillende persoonlikhede wat wêreldwyd erken word en om die konsep verstaanbaarder te verduidelik.

Hiervoor kan die Myers-Briggs-indikator gebruik word, asook die Keirsey-temperamentvraelys, sodat ’n mens jou eie persoonlikheid sowel as jou maat s’n makliker kan verstaan. Waar mense hulleself verstaan en hul wyse van denke kognitief kan ontleed, bring dit ’n erkenning en respek vir jouself en jou maat se andersheid. So kan hierdie professionele toetse regtig waarde toevoeg tot paartjies se lewe en genesing en herstel bring wat letterlik ’n huwelik kan red!

Hoeveel van julle het nie al na vriende en mense om julle geluister en diep binne jouself gedink hoe baie hulle van jou verskil nie?

•Party vriende kom altyd sterk oor en beskou jou ontspanne houding dikwels as luiheid, of dit is net mooi andersom.

•Ander vriende beskou alles altyd vanuit ’n emosionele oogpunt en maak jou, wat alles met jou verstand benader, soms moeg met al die emosies.

•Dan is daar weer mense vir wie tyd nie regtig so belangrik is nie en “betyds” eintlik ’n relatiewe begrip is – tot op die punt dat dit op konflik kan uitloop as iemand altyd laat is.

•Party mense soek bewyse en feite in alles en wil stuipe kry as jy met jou skerp intuïsie altyd jou sesde sintuig vertrou, omdat jy weet jou visioenêre insig die groter prentjie beter verwoord.

•Party mense is gemaak om te speel, ander van ons kan net soveel speel, dan moet daar gewerk word, anders sal geen take ooit voltooi word nie.

•Dan is daar die ewige praters en die stille luisteraars wat wens die praters kan soms net tussenin asemhaal, en so kan ek die voorbeelde vermenigvuldig …

Die meeste van ons besef teen hierdie tyd dat mense drasties verskil en sommige mense ons meer irriteer as ander, en ander ons weer meer aantrek met hul denkwyses en optrede. Hoe meer ons egter weet van hierdie verskille, hoe makliker kan ons mense verstaan wat anders as ons is. Want mense se inherente temperament nie verander nie. Daarom is daar ook geen rede om mense te probeer verander nie, dit put jou net uit, frustreer jou en mors jou tyd! Ons het almal al probeer en vies tou opgegooi.

Dit laat my altyd dink aan ’n man wat ’n nuwe televisiestel koop, maar nie die handleiding het nie. Nadat hy dit geïnstalleer het, eksperimenteer hy met al die knoppies, maar bly die ver­keerde reaksies kry. Dit voel soos ’n raai-raaispeletjie en loop uit op teleurstelling en chaos. Mettertyd raak hy so moeg vir hierdie onverstaanbare belegging waarvoor hy so baie betaal het – en tog doen dit nie wat hy wil hê nie.

Is dit nie ook maar soms hoe ons huwelike verloop nie? Ons speel almal soms raai-raai met ons maat se knoppies en word keer op keer teleurgestel! Nadat hulle ’n persoonlikheids­analise gedoen het, ervaar paartjies dikwels dat hulle nou eindelik mekaar se “instruksies” gekry het en kan leer watter knoppies werk en wanneer om wat te druk. Dit is ’n openbaring en kan ’n mens ’n totaal nuwe uitkyk op jou huweliksmaat gee!

Mense verskil op fundamentele wyses van mekaar en dit kan in hul optrede gesien word:

•Mense wil verskillende dinge hê. Dit word gemotiveer deur unieke motiewe en doelwitte wat volgens wie hulle is, gestel word.

•Elkeen reageer op ’n verskillende stel waardes en dit bepaal ons reaksies, impulse en optrede.

•Mense glo verskillend en verwerk inligting op verskillende maniere. Daarom verstaan hulle eenderse sake op verskillende wyses.

•Die maniere hoe ons optree en emosie openbaar, word bepaal deur ons behoeftes en persepsies. Al hierdie verskille sluit aan by ons persoonlikheid en juis daarom verskil mense so radikaal.

Mense is wat hulle dink.

– James Allen

Mense se eerste reaksie is om dít wat anders as hulle is te pro­beer verander, heel moontlik as ’n beskermingsmeganisme om hulleself teen die onbekende te verdedig. Juis omdat mense se andersheid ons soms verwar en laat twyfel of ons nie dalk verkeerd of meer deurmekaar is as wat ons besef nie, verdedig ons ons karakter en denkwyse soms met ’n ysere wil.

Wanneer ons egter besef dat daar nie ’n reg en verkeerd is nie, slegs ’n verskil omdat God ons elkeen uniek geskape het, kom daar ’n dieper verstaan van hierdie komplekse verskille. Verder is daar ook geen rede om hierdie andersheid te probeer verander nie, want heel moontlik is hierdie verskille meer goed as sleg – ons kan dit net nie altyd insien nie. Ons word elkeen verblind deur wie ons is. Ons manier van dink maak ons so blind vir ons eie foute en vir die manier waarop ons ander frustreer met wat ons doen.

“If I do not want what you want, please try not to tell me that my want is wrong. Or if I believe other than you, at least pause before you correct my view. Or if my emotion is less than yours, or more, given the same circumstances, try not to ask me to feel more strongly or weakly. Or yet if I act, or fail to act, in the manner of your design for action, let me be.

I do not, for the moment at least, ask you to understand me. That will come only when you are willing to give up changing me into a copy of you. I may be your spouse, your parent, your offspring, your friend, or your colleague. If you will allow me any of my wants, or emotions, or beliefs, or actions, then you open yourself, so that some day these ways of mine might not seem so wrong, and might finally appear to you as right – for me.

To put up with me is the first step to understanding me. Not that you embrace my ways as right for you, but that you are no longer irritated or disappointed with me for my seeming waywardness. And in understanding me you might come to prize my differences from you, and, far from seeking to change me, preserve and even nurture those differences.”

– David Keirsey & Marilyn Bates, Please understand me

Persoonlikheidstipering is die studie waar persone volgens opvallende persoonlikheidstrekke en tipiese gedragspatrone in kategorieë geplaas word om as ’n verwysingsraamwerk te dien om te help met die verklaring en beskrywing van menslike gedrag en belewenis (my eie verstaan).

Baie mense is aanvanklik skepties wanneer daar van per­soonlikheidsanalise gepraat word, want hulle wil nie in ’n boks gedruk word en met ’n persoonlikheid gelabel word nie. Ek kan dit met reg verstaan, want al word elkeen gebore met ’n spesifieke Godgegewe persoonlikheid, verander ons elkeen van geboorte af met blootstelling aan wêreldse omstandighede na ’n karakter. Ons elkeen se grootwordjare en die omgewingsfaktore het ’n baie groot invloed op die uitkoms van wie ons uiteindelik is – dus jou karakter.

Vandag, in die lig van wonderlike nuwe feite oor geheel­breinontwikkeling en karaktergroei, streef ons daarna om onsself in elke opsig beter te maak en is dit selfs moeilik om te besluit wie jy nou regtig is. Is jy nou die persoon soos jy geskape is (kom ons sê die oorspronklike jy voor allerhande karaktergroei by jou plaasgevind het), of die persoon wat jy op pad is om te word en waar jy met ander oë na jouself en ander sal kyk, danksy ’n verhoogde emosionele intelligensie? Of is wat jy was dalk die beter weergawe van jou, en hoe dan nou? Dit kan ons soms deurmekaar maak en dan gooi ons liewer tou op en leef maar so in onkunde voort. Op hierdie manier slaan jy hierdie wonderlike geskenk oor om te verstaan wie jy werklik is en sal jy jouself nooit regtig volkome ken nie.

Laat my toe om hierdie konsep vir eens en vir altyd duidelik uiteen te sit sodat jy nie dink die identifisering van jou persoonlikheid sit jou in ’n boks nie, maar gee jou juis die vryheid binne jouself sodat jy net jy kan wees!

Wanneer jy jou Skepper eendag ontmoet, gaan Hy jou net een ding vra: Was jy, jy?

– Leo Buscaglia

Wanneer mense hul persoonlikheidstipe wil identifiseer, is dit belangrik dat hulle tussen persoonlikheid en karakter onderskei.

Persoonlikheid is die unieke aangebore wil en wese waarmee elke baba gebore word en is reeds sigbaar op ’n paar weke. Hierdie persoonlikheid bepaal of die baba gretig is om te eet, maklik slaap, of dalk kriewelrig is of gou protesteer wanneer hy of sy ongelukkig is. Alle ouers leer ken hul kinders met die grille en giere en andersheid en eendersheid en weet: Dit is ons kindjie! Soos die kinders grootword, en hulle aan omgewingsfaktore, ouers, traumas en oorwinnings blootgestel word, word kin­ders se inherente persoonlikheid gevorm tot hul uiteindelike karakter. In hierdie opsig kan ons verstaan dat ’n mens nie jou persoonlikheid kan ontwikkel nie, maar wel jou karakter.

Met persoonlikheidsanalise wil ’n mens nie die mense se ka­rak­ter met hul aangeleerde gedrag vasvang nie, maar wel hul inherente, Godgegewe persoonlikheid. Wanneer ’n mens jou per­soonlikheid probeer identifiseer, kyk ’n mens nie na die “regte” eienskappe of dit wat jy wil wees nie, maar net na jou ware self, goed en sleg – die hele pakket. Tegnies gesproke sou ’n mens hierdie toets op verskillende tye van jou lewe kon afneem en sou die uitslag elke keer dieselfde wees, want dit vang ’n denkwyse, optrede en reaksie vas. Dit word weer deur jou in­herente persoonlikheid bepaal en nie deur jou ouderdom of geheelbreinontwikkeling nie.

Die Bybel verwys op verskeie plekke daarna dat God ons geskape het volgens ’n Meesterplan, en elkeen tot in die fynste besonderhede uniek en spesifiek geskape het om ’n spesifieke rol te speel en ’n spesifieke taak te verrig. Dit sou as jou roeping verstaan kan word.

You formed the way I think and feel. You put me together in my mother’s womb. You could see my bones grow as my body took shape, hidden in my mother’s womb. You could see my body grow each passing day. You listed all my parts, and not one of them was missing.

(Ps. 139:13,15,16) (ERV.)

Volgens hierdie Skrifgedeelte kan ons duidelik sien dat God ons persoonlikheidspesifiek geskape het – maar ook sekere dinge in ons lewe toelaat wat ons vorm en snoei.

Die Keirsey-persoonlikheidsanalise-model

Die Keirsey-persoonlikheidsanalise bied aan my as professionele berader die mees praktiese opsie om mense van hul identiteit te leer. Ná die uitslag van die analise help dit my om hulle beter te verstaan. Ek kan hulle dan help om mekaar beter te verstaan en hoe om mekaar op die beste manier te hanteer. Dit is ’n maklik toepasbare toets wat eenvoudig aangebied word en deur pro­fes­sionele persone in Afrikaans of Engels vanaf hoërskool tot op ’n hoë ouderdom afgeneem kan word. Dit is deur dr David W Keirsey, ’n veteraan-persoonliksheidsanalis van Amerika, ontwikkel wat spesialiseer in die pragmatiek van afrigting by ouers, kinders en huweliksmaats om konflik te verminder en samewerking te bevorder. Hy is ’n kliniese sielkundige wat al ver­skeie boeke in die menswetenskappe oor disfunksionele gedrag geskryf het, en het hierdie toetsing wêreldwyd bekend gemaak.

In Suid-Afrika is daar meer as ’n 1 000 professionele persone wat daagliks hiermee werk. Die toets kan vinnig en effektief gedoen word. Hierdie persoonlikheidstoets word ook wêreldwyd in die sakewêreld vanuit ’n sielkundige perspektief gebruik en help mense om binne hul sterkste talente te funksioneer en mekaar beter te respekteer vir wie hulle is.

Die kriterium waarop wêreldwyd gewerk word en waarvolgens persoonlikheid bepaal word, berus op vier alternatiewe en die kombinasies daarvan. Die kombinasie van een uit elk van die vier kategorieë sal dus jou persoonlikheid sterker weerspieël. (Dit word later duidelik uiteengesit.)

Jy is in elke kategorie een van die twee

(Die afkortings spruit uit die Engelse weergawe)

•Extrovert or Introvert (E/I) Ekstrovert of Introvert

•INtuition or Sensation (N/S) Intuïsie of Sintuiglikheid

•Thinking or Feeling (T/F) Denkend of Gevoelsmens

•Judging or Perceiving (J/P) Berekend of Begrypend

(Probeer om in hierdie stadium die afkortings te koppel aan die Afrikaanse begrippe sodat jy dit kan begin verstaan.)

Dit is waarlik belangrik dat ’n mens in gedagte hou dat mense nie slegs in een groep sal val nie, maar eienskappe van al­bei sal hê. Jy mag hoofsaaklik ’n Introvert(I) wees, maar in mindere mate ook Ekstrovert(E)-eienskappe besit. Dit is juis die mate waartoe ’n persoon natuurlik tot ’n groep neig wat bepaal wat jou inherente persoonlikheid is. Ná die toetsing van persoonlikheidstipe sal hierdie begrip duideliker verstaan word, maar maak jouself so­lank vertroud met die verskille. Ter wille van ’n beter verstaan hiervan kan jy probeer om in hierdie groepe jouself te identifiseer en jou sterkste voorkeur neer te skryf.

Extrovert/Introvert (E/I) Ekstrovert/Introvert

(Hoe jy jou energie inneem.)

Om te onderskei kan ons sê dat Ekstroverte(E) hul energie kry van menslike interaksie met ander. Hulle is gereeld sosiaal en geniet ander mense se teenwoordigheid. Hulle het letterlik mense nodig om te funksioneer en hulself te herlaai. Hulle funksioneer daarom goed binne groepsituasies.

Introverte(I) is weer meer na binne gekeer en verkry hul energie vanuit hulself en hul gedagtes en gevoelens. Hulle geniet tyd op hul eie en herlaai wanneer hulle in hul eie spasie is en privaatheid het. Hulle is gewoonlik nie groepdiere nie en sal ten beste onafhanklik funksioneer. Te veel menslike interaksie in een dag mag hulle moeg en gedreineer laat.

(Let wel: Hulle geniet mense ook, maar verkies om nie die grootste deel van die dag tussen mense te wees nie en geniet dan een-tot-een-verhoudings, waar groepe mense hul energie kan dreineer.)

(Kyk na die kort opsomming en waar jy onseker is tussen twee alternatiewe, skryf neer in watter kategorie jy meer natuurlik val.)

EKSTROVERT(E)	INTROVERT(I)
Geniet mense en nooi hulle graag binne.	Geniet hul eie geselskap en is tevrede tuis.
Hulle is vrolik en mensgerig.	Hulle is gereserveerd.
Onderbrekings kan hulle stimuleer.	Onderbrekings trek hul aandag af.
Praat oor wat hulle dink; dink hardop.	Is privaat en hou hul gedagtes binne.
Hulle funksioneer graag in ’n groep.	Funksioneer graag onafhanklik en alleen.
Geniet interaksie.	Geniet konsentrasie.
Sosiaal.	Territoriaal.
Doen eers en dink later.	Dink eers en doen later.
Funksioneer in die algemeen.	Funksioneer in diepte.
Praat soms te veel.	Praat soms te min.
Volgens David Keirsey: 75% van die samelewing	Volgens David Keirsey: 25% van die samelewing

Kies jou persoonlike voorkeur:

INtuition/Sensation (N/S) Intuïsie/Sintuiglikheid

(Die manier waarop jy inligting inneem wat tot besluitneming lei.)

Sintuiglike(S) mense maak ten sterkste gebruik van hul vyf sintuie om inligting op te neem en is gewoonlik realisties en prakties in alles wat hulle aanpak. (Die vyf sintuie: reuk, sig, gehoor, tas, smaak.)

Hulle is die mense wat bewyse in alles soek en ondervinding en feite vertrou. Hul voete is plat op die aarde en hulle leef in ’n wêreld van werklikhede. Hulle sal ’n taak in kleiner dele opbreek om dit verstaanbaar te maak en is planmakers wat binne ’n roetine kan funksioneer. Hulle verwag dat elkeen sy deel moet doen en gee self hul beste.

Intuïtiewe(N) mense vertrou hul sesde sintuig (intuïsie) en neem die meeste inligting op deur ’n “gevoel”. Hulle is visioenêr in hul denke en kan hul verbeelding gebruik om kreatief te wees. As kinders was hulle dikwels dromers en kon stories opmaak, fantaseer en hulself soms lekker in ’n wêreld van hul eie inleef. As volwassenes leef hulle in ’n wêreld van moontlikhede – herhaling en roetine kan hulle uitput. Hulle het nodig om binne nuwe inspirasie te funksioneer en sien die lewe vanuit ’n heel ander perspektief as die sensoriese persoon.

SENSORIES(S)	INTUÏTIEF(N)
Reageer op ondervinding.	Reageer op intuïsie.
Leer uit die verlede se ervarings.	Kyk vorentoe na die toekoms.
Realisties en prakties.	Spekulatief, kreatief en vindingryk.
Leef binne die werklikheid.	Leef in ’n wêreld van wat kan wees.
Breek in dele op om verstaanbaar te maak.	Sien die groter prentjie.
Werk met feite en duidelike instruksies.	Gebruik hul voorgevoel en sesde sintuig.
Funksioneer binne aksie.	Funksioneer binne moontlikhede.
Maak projekte klaar.	Geniet die projek tot iets nuuts opdaag.
Voete plat op die aarde. (Realis)	Kop in die wolke. (Dromer)
Volgens David Keirsey: 75% van die samelewing	Volgens David Keirsey: 25% van die samelewing

Kies jou persoonlike voorkeur:

Thinking/Feeling (T/F) Denkend/Gevoel

(Dink jy met jou hart of met jou kop wanneer jy besluite neem?)

Denkers(T) is logiese mense en maak meer staat op kopbesluite. Hulle staan vir die waarheid en sal veg om hul punt oor te dra, selfs al kan dit ander seermaak. Hulle is taakgerig en laat hulle nie maklik deur emosies afsit nie. Hulle raak nie te persoonlik by mense betrokke nie en bly objektief. Hulle mag vir ander koud voorkom en is gewoonlik redelike hardekoppe. Hulle ver­wag die beste van elkeen en raak ongemaklik met te veel emosionele vertoon.

Gevoelsmense(F) dink letterlik met hul harte en beleef emosie in hul besluitnemingsproses. Hulle identifiseer per­soonlik met mense en word as warm, liefdevolle mense ervaar. Hulle is gemaklik met hul eie emosies en maak staat op hul waardes en wil ander graag akkommodeer.

Albei tipes is nodig en bruikbaar, maar hulle sien en beleef dinge totaal verskillend: Die een vanuit die hart(F), en die ander vanuit die kop(T). Onthou egter dat albei emosie beleef, die denker is net nie gemaklik om daaraan uiting te gee nie en sal miskien rooi raak of sweterige hande kry by die belewing daarvan. Net so gebruik die gevoelsmens ook sy kognitiewe denke, maar ervaar hy eers die hart se roepstem bo sy kop.

DENKEND(T)	GEVOELSMENS(F)
Besluit met logiese denke.	Besluit met emosie, sterker as denke.
Gee kritiek.	Gee waardering en warmhartigheid.
Ferm.	Gebruik oortuiging of manipulering. (Sag)
Taakgerig.	Verhoudingsgerig.
Objektief.	Subjektief.
Regverdig en eerlik, dikwels nie gepla oor ander se gevoelens nie.	Diplomaties en versigtig vir ander se gevoelens.
Onpersoonlik betrokke.	Persoonlik betrokke.
Neem opinies nie persoonlik op nie.	Neem alles persoonlik op.
Gee erkenning meestal slegs waar prestasie oorskry is.	Gee lof vir enige prestasie.
Het ’n harde kop.	Het ’n sagte hart.
Volgens David Keirsey: 50% van die samelewing	Volgens David Keirsey: 50% van die samelewing

Kies jou persoonlike voorkeur:

Judging/Perceiving (J/P) Berekend/Begrypend

(Vind jy jou vrede binne afhandeling en orde of irriteer dit jou?)

Hierdie voorkeur is ’n totale verskil in lewensbenadering en kan groot konflik en irritasie in verhoudings bring – by vriendskappe sowel as in die huwelik. Wanneer mense ’n nodigheid vind om take te voltooi en eers vrede ervaar as dit afgehandel is, is hulle Berekend(J). Hulle sal ’n dringendheid ervaar tot ’n projek voltooi is en kan dan eers waarlik ontspan. Hulle hou van orde, goeie tydsbeplanning en is gewoonlik betyds of streef daarna. Hulle beplan hul lewe en wil gereed wees vir aksie, en daarom voel hulle veilig in ’n georganiseerde beplande omgewing. Hulle hou nie van verrassings nie en leef binne redelike grense wat hulle aan hulle self stel. Hulle kan streng wees oor netheid en sukkel om binne chaos te funksioneer en te konsentreer.

Begrypende(P) mense ervaar nie ’n dringendheid om dinge af te handel nie en kan sulke druk as stresvol ervaar. Hulle hou van die vryheid van die lewe en ervaar reëls en keerdatums as onnodige struikelblokke. Hulle het ’n meer gemaklike benadering ten opsigte van die lewe en kinders grootmaak – chaos kan later opgeruim word. “Live and let live!” Hulle verkies avontuur en wil nie hul lewe haarfyn beplan nie; hulle laat ruimte vir spontaneïteit en geniet dit om impulsief te kan reageer. Tyd pla hulle nie, ’n paar minute laat sal niemand doodmaak nie. Hulle kan mense wat altyd betyds is en almal aanjaag, vanuit hul rustige wese, soms as irriterend en vervelig ervaar. (Hoewel teenoorgesteldes mekaar tog kan aantrek.)

BEREKEND(J)	BEGRYPEND(P)
Maak werk klaar voor hulle speel.	Werk en speel soos hulle voel.
Hulle het ’n behoefte aan netheid, orde en voltooiing.	Hulle ervaar druk wanneer netheid gehandhaaf en take voltooi moet word.
Besluite is vas.	Alles is veranderbaar.
Beplan vooruit.	Pas aan soos die dag vorder.
Voel veilig binne reëls en prosedures.	Vind reëls beperkend en wil vry wees.
Gedruk vir tyd – meestal betyds.	Daar’s nog baie tyd.
Verkies sperdatums.	Sien sperdatums as relatief.
Hou daarvan om dinge klaar te maak.	Hou daarvan om dinge te begin.
Geniet die finale produk.	Geniet die tentatiewe produk met ruimte vir verandering.
Beplan hul toekoms.	Laat die lewe net gebeur.
Volgens David Keirsey: 50% van die samelewing	Volgens David Keirsey: 50% van die samelewing

Kies jou persoonlike voorkeur:

Noudat die vier verskillende voorkeurvlakke geïdentifiseer en verduidelik is, skryf jou vier letters neer waar jy meestal funksioneer en let op die kombinasies daarvan. Vanuit hierdie vier voorkeurvlakke ontstaan daar dan 16 verskillende persoonlikhede wat op sekere aspekte ooreenstem en op ander drasties en beslis verskil. Byvoorbeeld ESTJ of INFP of …

Tydens professionele persoonlikheidsanalise word elke spesifieke persoonlikheidstipe breedvoerig bespreek, met verwysing na die benadering tot werk, as huweliksmaat, kinderlewe en tipiese persoonlikheidstrekke. Moontlike beroepe word ook bespreek en ’n persoon se inherente benadering ten opsigte van die lewe word duidelik en sigbaar weerspieël, sodat ’n mens jouself sien presies soos jy is. Laat jou persoonlikheidsanalise by iemand professioneel doen, juis omdat jy nou verstaan hoe grondig mense verskil. Op hierdie manier kan jy hieruit iets oor jouself leer wat waarde tot jou lewe toevoeg.

Ek hoor gereeld dat mense tydens die voorlees van hul per­soonlikheidstipe vir my sê dat niemand hulle nog ooit so raak beskryf het soos hierdie persoonlikheidstipering nie. Dit is of ’n mens antwoorde op vrae kry waaroor jy nog altyd gewonder het, en so bring dit ’n dieper verstaan en aanvaarding van jouself net soos God jou gemaak het.

Selfs ná die ware persoonlikheid uitkom en jy sien hoe jou brein funksioneer ten opsigte van besluitneming, gedrag, per­soonlike spasie en emosie, is dit steeds nodig om jouself te sien vir wie jy is, en te kyk of jy binne die wil van God leef ten opsigte van jou naaste en jou God.

Deurgrond my, o God, en ken my hart; toets my en ken my gedagtes; en kyk of daar by my ’n weg is van smart, en lei my op die ewige weg!

(Ps. 139:23-24) (1953-vertaling.)

Waste no more time arguing what a good man should be. Be one!

– Marcus Aurelius

(Keirsey-seminare word op ’n gereelde basis landwyd profes­sio­neel deur Antoinette Struwig aangebied. Afrikaanse en Engelse verwerkings van verskillende dele van die handleidings, asook ’n CD met ’n elektroniese weergawe kan direk bestel word.

Antoinette Struwig

astruwig@lantic.net

Enige navrae ten opsigte van gekwalifiseerde professionele per­sone in jou omgewing wat hierdie toetse afneem, kan gerig word aan Antoinette Struwig.)