Читать книгу Sonder Chocolate Charlie - Marga Jonker - Страница 7

Die vendusieperd se vreemde toertjie

“Hallo, hallo, en wat dink julle van my winskopie?” groet Oupa Sallie terwyl hy die saal oor die boonste balk van die heining hang.

“Sy is baie mooi, ek hou van haar kleur,” sê Hein, “maar wat gaan Oupa met haar doen?”

“Nee, ek sal maar moet sien, sy het net so verlore gelyk tussen al die ou meubels, ek móés haar net koop,” verduidelik Oupa Sallie. “sy is pragtig, soos julle kan sien. Verder was sy ’n winskoop, ek het haar vir ’n appel en ’n ei gekoop. Ek kon net nie anders nie.

“En ek het nog ’n paar kissies en koffers en goed ook saam met haar gekry. Ek moet dit nog by die afslaer in die Kaap gaan haal. Daar was nie plek vir ’n ponie met bagasie én outydse kaste in die sleepwa nie.”

“Oh, she comes with baggage?” spot Andrew.

“Moenie van die kat vergeet nie,” terg Hein.

“Ha! Spot maar. Ek dink sy is spesiaal. Geen perd kan so intelligent lyk as sy nie liefdevol versorg is nie,” sê Oupa Sallie.

“Ja, Oupa, maar sê nou sy is soos tannie Hestertjie se perd – daardie een wat sy soos ’n hond vertroetel het?” vra Nell besorg.

“Praat jy van die Shetlandponie wat in tannie Hestertjie se kombuis geslaap het?” vra Hein.

“’n Regte lemon, niemand kon ooit op daardie perdjie gery het nie, hy het gebyt soos ’n hond en geskop soos ’n rodeo-bul,” vertel Hein.

“Ja, maar daardie perdjie was ook goed versorg,” sê Nell.

“Wel, ja, Ratu hét snaakse maniere, dit het ek en Dok mos uitgevind,” grinnik Oupa Sallie. “Dok het haar ­bietjie deurgekyk. Sy is gesond en mak, maar sy is net nie ’n ryperd nie. Sy skop en byt darem nie. Sy is baie beter gemanierd as ’n hele paar van Solitaire se perde.”

“Wat doen sy? Bokspring sy?” wil Hein nuuskierig weet.

“Hou dop, Heinman, dit is ’n baie vreemde ding,” sê Oupa Sallie geheimsinnig. Hy beduie met die toom na Andrew.

“Kom, Andries, jy het mos gisteraand gesien wat die perdjie se toertjies is, vang haar daar vir ons.”

Andrew klim deur die heining en neem die toom aan. Dit is ’n toom met ’n sagte stang. Andrew stap na Ratu toe. Ratu deins nie terug nie en bly rustig staan terwyl Andrew die toom saggies oor haar kop trek. Sy staan doodstil terwyl hy eers die neusband en dan die keelband vasgespe en haar lang wit maanhare onder die sterband uittrek. Ratu begin wel dadelik aan die stang kou en wikkel haar neus.

“Sy lyk nie gevoelig of oorsensitief op enige deel van haar kop nie,” merk Hein op. “Sy reageer eintlik soos ’n opgeleide ryperd.”

“Ja, jy’s reg,” sê Nell. “Oupa, hierdie merrie is hondmak, wat is dan die probleem?”

Andrew stap ’n paar maal in die rondte deur die kamp met Ratu en sy volg hom lewendig. Daar is geen sprake van nukke nie. Andrew gaan staan by die saal wat oor die boonste houtbalk hang en Ratu ruik-ruik aan die leersaal met die sagte skaapvel-saalkleedjie en die enkelbuikgord.

“Wel, nou sal julle sien wat gebeur,” glimlag Oupa Sallie. Hy haal die saal van die balk af en gaan staan aan die ponie se linkerkant met die saal oor sy arm. Andrew staan voor Ratu met die teuels in sy hand. Hein en Nell hou Oupa Sallie nuuskierig dop.

Hy vee ’n paar maal rustig met sy regterhand oor Ratu se rug. Sy wriemel die vel op haar rug, maar bly mooi stilstaan toe Oupa Sallie die saal oor haar rug skuif.

Sy trippel, trap of draai nie onder die saal uit nie. Oupa Sallie skuif die buikgord saggies onder haar blaaie deur en trek dit vas. Hein wag oorgehaal vir wat volgende gaan gebeur. Nell kou haar duimnael.

Andrew gee die toom se teuels skiet en tree weg van Ratu af. Hy weet wat om te verwag.

Oupa Sallie sit sy hande op die saal asof hy wil opklim en fluit versigtig vir Ratu, soos Oupa altyd maak as hy op ’n vreemde perd klim. Ratu se knieë knak skielik onder haar soos ’n kameel s’n asof sy flou word en sy gaan lê plat op haar regtersy.

“Tik my om met ’n veer! Ek het nog nooit so iets gesien nie.” Hein skud sy kop.

“Jip, dit is haar toertjie. Dit is wat sy dink sy moet doen wanneer sy ’n saal op haar rug kry,” verduidelik Oupa Sallie.

“Wel, dit is flippen weird!” Nell skud haar kop ver­dwaas.

“Ja, en jy kan haar nie roer nie, ek en Dok het probeer. Sy bly so lê tot jy die toom en saal aftrek, dan sal sy eers opstaan.” Oupa Sallie staan ’n tree terug en bekyk die merrie wat steeds roerloos op haar sy lê.

Hein staan nader en druk teen haar skouer, maar Ratu lê asof sy narkose gekry het. Sy maak haar oë toe, strek haar bene styf uit asof sy haar laaste asem uitgeblaas het en steun en kreun soos Huffel wanneer hy diep slaap.

Oupa Sallie maak die buikgord se gespe los en haal die saal van haar rug af, terwyl Andrew die toom van haar kop aftrek. Ratu kom rustig regop en skud haar af asof dit die normaalste ding op aarde is.

Sy spits haar ore en draai nuuskierig weg van hulle en kyk in die rigting van ’n groot trok wat in die verte aan­kom.

“Hier kom Colette en die besoekers nou,” merk Oupa Sallie op. Almal kyk in die rigting van die plaashek, waar die trok ingedreun kom.

Wat sou verkeerd wees met die palomino? Sy is ’n weird perdjie, sy is soos ek, dink Nell. Sy lyk oukei en heel normaal, maar sy ly ook aan weirdness-siekte in die ergste graad.