Читать книгу Пробуждение. Стихотворения и поэмы / Уһуктуу - Михаил Иванов - Страница 34

Дорообо, кыһыҥҥы сарсыарда!

Кэллиҥ эн, көм хаары оймооҥҥун,

Түүннүктэр таастарын кырыарда

Дьэрэкээн оһуору уураҥҥын.

Тыҥ хатар дьыбара дьааһыйан

Будулҕан туманы үрэйдэ,

Хара түүн суруйбут сэһэнин —

Кыыл суолун кыраһа бүрүйдэ.

Кыһыл күн сис үрдүн таарыйан

Наҕыллык күөрэйэн таҕыста,

Тумарык сабыытын быыһылаан

Сир иэнин симиктик сырдатта.

Көмнөҕү бүрүммүт бэс мастар

Кэриигэ тураннар нуктууллар,

Күөх лабаа киистэлэр быганнар

Кэлэр кэм сайынын саныыллар.

Сарсыарда кэлбитин уруйдаан

Тоҥсоҕой тоҥсуура дорулуур,

Нус – бааччы олоҕу туоһулаан

Үөлэспит унаарыйа буруолуур.