Читать книгу Пробуждение. Стихотворения и поэмы / Уһуктуу - Михаил Иванов - Страница 36

Оҕо сааспыт ардаҕа

Отой атын курдуга,

Сайа охсон, санааҕа,

Салгынныын да ордуга.

Үрүйэчээн сыһыынан

Кылыгырыы сүүрэрэ,

Солко былыт быыһынан

Сайдам күммүт күлэрэ.

Ытыспытын тоһуйан

Таммах тута ооньуурбут,

Онтон олус дуоһуйан

Тутум үрдүүр буоларбыт.

Чалбааттана хаһыйан

Чалбах уутун ыһарбыт,

Күнү көрсө хайыһан

Кустук өҥүн көрөрбүт.

Оҕо сааспыт ардаҕа

Түргэнник да аастаҕа…

Саатар биирдэ эн кэлиий,

Сылам кэммин эргитиий!