Читать книгу Bärner Mundart us Kanada - Ursula Thierwächter - Страница 11

Wie isch di Name?

My Name isch Ursula Bachmann, Tochter des Hermann Bachmann und der Elisabeth Bachmann, geborene Strelececk.

Won i de mit sächs Jahr bi ygschuelet worde, het my Pflegvater die zueständegi Lehrerin gfragt, göb sie nid - eifachheitshauber - dr Name vo ihne, de Pflegeltere, chönnti is Zügnis schrybe. Anschynend isch das kes Problem gsi und vo denn aa het es gheisse:

Ursula (Bachmann) Häni, des Erwin und der Emma Häni, Küehni, Chlammere (Pflegeeltern).

En offizielli Namesänderig han i nie gseh und isch ou nie gmacht worde. Mi Taufschyn isch uf Ursula Bachmann usgsteut gsi, aber alli myner Zügnis und Verträg, si ab mynere Schueuzyt uf Häni usgschteut worde. So bin ig als Ursula Häni dürs Läbe gange und niemer het je öppis gfragt. Der Heimatort Luzern, han i aber immer vo mim richtige Vater bhaute gha.

Mit zwänzgi han i ghürate. ä Walliser mit em Name Mattig.

Die Beziehig isch vo Aafang aa, zum Schytere verurteilt gsi und nach vierne Jahr, han i mi - zu mym Glück - chönne la scheide.

Vo jetz aa het es i myne Papier gheisse:

Ursula Bachmann, des Hermann Bachmann und Elisabeth Bachmann, Geborene Strelececk.

Namensänderung: Häni, des Erwin Häni und Emma Häni, geborene Kühni. geschiedene Mattig.

I ha de 1975 wieder ghürate und ou dr Name vo mym Maa aagno, Thierwächter. So heissen i no hüt, obschon i syt 2001 gschide bi.

Woni de d’Uswanderigspapier für nach Kanada usgfüllt ha, bin i scho chly in trouble gsi. Ke Mönsch het chönne nachevollzieh, wohär all die Näme. mit dene verschiedene Eltere chöme.

Vorallem han i äbe gar kener Papier gha, wo dä Wächsel vo Bachmann zu Häni beleit hätte.

Wo de dr Urs und i de ghürate hei, han i – sicherheitshauber – dr Name Thierwächter bhaute.

Öppe glych isch es mit dr Religion gsi. Als Chind het me mir verzeut, dass i z’Schüpfheim LU, imene Heim, by katholische Schwöschtere sigi gsi.

Touft worde bin i aber i dr Heiliggeischt Chile z’Bärn und die isch Evangelisch-Reformiert. Ig bi de ou z’Aarwange konfirmiert worde…natürlich uf e Name, Ursula Häni!

I mym ganze Läbe isch es chly so gsi, dass ig mängem Ort näbenabe gheit bi. Niene han i richtig drzue ghört, irgendwie isch eifach nüt normal gsi.

Und drum no grad äs angersch Byschpiel, wo die Theorie beleit: Früecher, wonis no nid besser gwüsst ha, da bin i by de Horoskop (ömu meischtens) eifach ä Steibock gsi, i ha am 20. 1. Geburtstag. Woni de i de 90ger Jahr z’Bärn, bym Roland Jakubowitz e Astrologie Uusbildig gmacht ha, het me de die Sach chly gneuer aagluegt und äbe professionell usgrächnet. Ab denn, bin i de plötzlich ä; uf Null Grad geborene Wassermaa gsi!

Isch jetz das nid wieder tüpisch? Nid mou im Horoskop, bin ig öppis Eidütigs. Nei, ä Null Grad Wassermaa! So nes laari faari Züüg muess es si!

So, jetz liseni grad z‘Trotz immer beidi Horoskop, das vom Steibock und das vom Wassermaa und das, wo mir de besser gfaut, das gilt de äbe für mi.

Jetz het das laari faari Horoskop plötzlich ganz en angeri Qualität, es laat mir nämlich d‘Wahl! ☺