Читать книгу Асылташ = Драгоценный камень - Юнысова Асия, Асия Юнысова - Страница 19

Универмаг тора анда хәзер.

Биек шундый, әллә ун катлы.

Түр бакчалы, челтәр кашагалы

Агач өйләр иде ул чакны.

Агач өйле шәһәр бар иде шул.

Кемдер шуны үлеп сагына.

Мин авылдан. Анда кычытканнар

Гаскәр кеби нигез сагында.

Түр бакчалы өйләр каршысына

Таш гасыры баскач өрәктәй,

Нәфис гөлләр ничек чыдасын ла,

Әрекмәннәр хәтта өректе.

Күчеп киткән моннан хуҗалары.

Качып калган сыңар гөл-орлык.

Шытып чыгар әмәл тапкан ласа!

Матур үзе – карап торырлык.

Сабагыннан кыскан тимер-бетон.

Җиләс җилгә сузган ал башын.

Шундый тансык аңа иркен бер тын,

Шундый кирәк аңа ышану!

Кулъяулыктан күчкән бизәк кебек,

Таш астыннан чыккан ал чәчәк.

Япа-ялгыз калып нигез саклый!

Иң соңыннан өмет үләчәк.