Читать книгу Асылташ = Драгоценный камень - Юнысова Асия, Асия Юнысова - Страница 23

Болгар җирләренә барасым бар,

Сулар аласым бар коедан.

Мин үзгәрәм анда, алмашынам

Болгар җилгә битем куюдан.

Кылган юртып искән әремле җил

Сыйпап йөри Шәһри каберен.

Идел-Чулман кашы – асылташның

Ник җуелган таҗлы кадере?

Чулпы җырын өзгән кылыч чыңы.

Кайсы көндә булган, кайчан бу?

Су хәтере тирән – шулай диләр –

Кое күзләрендә уйчан су.

Бабаларым эчкән судан хәбәр!

Ни беләсең, кое – меңьяшәр?

Мин болгарның татар оныгымын,

Уйчан күзгә карап эндәшәм.

Мең сорауга эзләп бер җавапны,

Һаман киләм монда, юл чыгам.

Шыгыр-шыгыр чыгыр, җырлы чылбыр:

Хәтерле су чыга юлчыга.

Кое суын эчкән сәхабәләр.

Иман иңгән җирдә тылсым бар.

Дым качырмый ун гасырлык кое,

Болгар илгә дога кайтсынга.

Уйлы күзгә өмет белән карап,

Күрдем анда дәвер күкрәвен.

Эчәр суы – мөлдерәмә кое!

Җирдән китмәс әле бу кавем.