Читать книгу Ko lat ons sing - Adam Small - Страница 31
Eksegese I
Оглавление2 Konings 2:1–12
Elisa, bly tog hier in Gilgal
die Here roep my alleen na Bet-el
sê Elia, die man met die ligte vel
maar Elisa sê: sowaar die Here leef
sowaar as daar asem in my liggaam beef
ek verlaat jou nie
toe sê Elia: bly hier, die Here bo
– en jy en ek moet Hom albei glo –
wil hê ek moet alleen na Jerigo
maar Elisa sê: sowaar die Here leef
sowaar as daar asem in my liggaam beef
ek verlaat jou nie
toe sê Elia: nou moet ons uitmekaar uit gaan
die Here wil hê ons moet mekaar laat staan
die Here roep my alleen na die Jordaan
maar Elisa sê: sowaar die Here leef
sowaar as daar asem in my liggaam beef
ek verlaat jou nie
toe was Elia radeloos
Elisa wou nie weg nie, Elisa wou nie skei
Elisa het soos ’n skadu op sy spoor gebly . . .
maar toe word die Here self vir Elisa boos
– want die Here is met sy eie, bars of breek
die Here laat sy eie nooit in die steek –
en die Here het uit die storm gestuur
die wa met die perde en die vuur
*
Elisa het na sy donker vel gekyk
en verleë deur die donker weggestryk
