Читать книгу Kan ek maar aan jou selluliet vat? - André le Roux - Страница 16

Só werk ’n ereksie

I wonder why men get serious at all. They have this delicate, long thing hanging outside their bodies which goes up and down by its own will. If I were a man I would always be laughing at myself.

– Yoko Ono

Die boodskap kom reguit van sy brein af en skiet deur na die senuwees in sy pelvis: Jy hou van wat jy sien, sê sy brein, maak jou gereed vir genot. Sonder hierdie breinboodskap, en testosteroon, sal daar nie ’n ereksie wees nie.

Daar is twee soorte.

1. ’n Refleks-ereksie gebeur onwillekeurig wanneer die penis aangeraak of gestimuleer word. Senuwees in die onderste gedeelte van sy rugmurg is betrokke. Dit gebeur ook wanneer ’n man slaap, drie tot vyf keer per nag. Daar word bespiegel ’n vol blaas kan die oorsaak wees. Hy kan selfs ejakuleer, die sogenaamde “wet dream” of nagtelike ejakulasie, wat veral vanaf puberteit algemeen gebeur vanweë verhoogde hormoonvlakke – met die bekommernis dat sy ma dit gaan agterkom aan sy nagklere. Hy self kom dit eers agter wanneer hy wakker word. (Jy kan ook nagtelik ejakuleer wanneer onwillekeurige vaginale lubrikasie in jou slaap plaasvind.)

2. Die sogenaamde psigogeniese ereksie is ’n reaksie op erotiese of emosionele stimulasie en vind plaas in die limbiese stelsel.

Salpeteroksied word afgeskei (pure perd), wat die gladdespiere in die drie sponsagtige penisbuise of -kamers (met erektiele weefsel) laat ontspan sodat die buise oopgaan. Die eerste twee buise is die corpora cavernosa en die derde een die corpus spongiosum. Die corpora cavernosa lê weerskante van die corpus spongiosum met die uretra in die middel. Wanneer die buise oopgaan, vloei bloed onder druk in deur die slagare wat na die penis lei. Terselfdertyd maak die are waardeur bloed uitvloei toe vanweë die druk van die bloedgevulde buise, en keer die bloed vas. Meer bloed vloei die penis binne as wat dit verlaat totdat daar ’n balans is tussen bloed wat inkom en bloed wat uitgaan. Hierdie ekwilibrium hou sy ereksie konstant.

Die bloed maak die penis nie net styf nie, maar ook langer en dikker.

Daar het jy dit: ’n ereksie.

Die omgekeerde gebeur wanneer die penis verslap. (’n Vrou se ereksie werk dieselfde. Jy kry dit net op ’n ander plek – in die klitoris en rondom die opening van die vagina.)

Maar dinge kan verkeerd loop …

1. Erektiele disfunksie

Indien die slagare in sy penis nie behoorlik oopmaak om bloed in te laat nie is dit moeilik of onmoontlik om ’n ereksie te kry. Erektiele disfunksie (ED, vroeër impotensie genoem) beteken hy kan nie ’n ereksie kry of lank genoeg behou om die seksdaad deur te voer nie.

Partykeer sukkel hy net nou en dan om ’n ereksie te kry, of die ereksie is nie ferm genoeg nie – ’n sogenaamde “lui” ereksie. Maar as ’n man oor ’n sekere tydperk nie ’n ereksie kan kry nie, is daar fout.

Die redes kan veelvuldig wees, maar dis gewoonlik sielkundige faktore, die man se ingesteldheid teenoor seks of dalk skuldgevoelens. (“Jy gaan hare op jou handpalms kry! En dan gaan jy blind word!”)

Ander oorsake is mediese toestande, soos kardiovaskulêre probleme, bloeddruk en bloeddruk-medikasie, verhoogde cholesterol of diabetes, te min testosteroon (bekend as hipogonadisme), of dis ’n newe-effek van ander medisyne, soos antidepressante. Dwelms soos kokaïen en heroïen speel ook ’n rol. So ook alkohol, hoewel ’n matige hoeveelheid ’n seksopkikker is. (It provokes the desire, but it takes away the performance. – Shakespeare.)

En nikotien vernou die are in die liggaam, ook in die penis, sodat bloed nie so maklik kan invloei nie – dis bewys ED kom 85% meer voor by rokers as by nie-rokers.

Stres, angstoestande en oorgewig eis ook hul tol. Of doodgewone moegheid. Sit daarby die vrees vir mislukking in die bed (performance anxiety).

En miskien moet hy nie so baie fietsry nie! ’n Studie (2002) onder polisiemanne op fietse het ’n verband bevind tussen die aantal ure in die saal en ED …

ED tref sowat een uit tien mans, die een of ander tyd in hul lewe. Hoe ouer, hoe meer. Dit raak die helfte van mans bo 40.

Die International Index of Erectile Function (IIEF) is ’n vraelys, ingestel in 1997, wat algemeen gebruik word om die graad van ED vas te stel. Die man beantwoord bloot vrae oor sy seksuele ervaring die afgelope vier weke. Dis ontwerp om die volgende vyf erektiele “domeine” op ’n skaal van 1 tot 5 (erge disfunksie tot geen disfunksie nie) te bepaal: a. erektiele funksie, b. orgasmiese funksie, c. seksuele begeerte, d. satisfaksie tydens seks, en e. algemene satisfaksie.

Verskillende behandelings is beskikbaar – van testosteroon-aanvullings tot pille soos Viagra, Levitra of Cialis. Die ekstra testosteroon sal hom lus maak, maar die genoemde drie pille werk in op die bloedvate en sal ’n ereksie aanbring, maar hom nie noodwendig lus maak nie. (Hoekom dan in die eerste plek die pil sluk, man?)

Sy dokter sal kan voorskryf wat die beste is. Onthou, ED kan ’n aanduiding van hartprobleme wees. Dit moet liefs nie geïgnoreer word nie.

Die baanbreker van behandeling in pilvorm was ’n Britse fisioloog, Giles Brindley. Hy’t ’n klomp uroloë op ’n kongres in Las Vegas (reeds in 1983) byna agteroor laat val deur homself op die verhoog direk in sy penis in te spuit met fentolamien. Hy’t oombliklik ’n ereksie gekry. Dié middel dien as ’n verslapper van die gladdespiere in die bloedvate van die penis, wat die weg baan vir meer bloed omdat die bloedvate dan ontspan. Dit gee ’n ereksie wat ’n paar uur sal hou. (Gladdespiere speel ’n kardinale rol in enige ereksie.)

Voor dr. Brindley se manewales is gedink die oorsaak van ED is bloot sielkundig, in ’n man se kop. Hierna was ’n inspuiting met ’n baie dun naald direk in die penis (kan jy dink?!), deur die man self toegedien, ’n algemene oplossing vir ED.

Totdat navorsers in 1998 by middels soos Viagra uitgekom het …

2. Premature ejakulasie

Dit kan ’n man baie ontoereikend en … onmanlik laat voel. Julle het nog nie begin nie, dan’s hy al klaar en jy voel afgeskeep.

Hoe gou is te gou?

Die eenvoudige antwoord: Dit is te gou as dit inmeng met ’n bevredigende sekslewe vir júlle. Volgens die Amerikaanse Urologiese Vereniging tref dit 27-34% van mans. Navorsers (2005) reken as dit minder as een en ’n halwe minuut duur voor hy ejakuleer, kan dit as premature ejakulasie beskou word. Dit hang natuurlik af of hierdie minuut en ’n half ’n probleem is vir jou of vir hom. Indien nie, is dit nie prematuur nie.

Weer eens is die oorsaak velerlei fisieke of geestelike probleme soos stres, depressie, ’n swak selfbeeld, kwaad vir jou maat, wat ook al. Te min serotonien kan ook ’n rol speel. Of doodgewone hiperkatoolsgeit, hy kan sy lus net nie hou nie.

(Gewaande) kure is volop. Gaan maar liewer dokter toe om seker te maak wat gaan aan …

3. Vertraagde ejakulasie

Dis die ontwykende orgasme, wat eweneens op mediese probleme kan dui: Hy kom net nie klaar nie, hy karring en karring. Terwyl die deursneeman in ’n paar minute ejakuleer, sukkel hy terwyl daardie minute verbytik. Jy verloor later moed.

Soos hulle in Namakwaland se wêreld sê: “Ek. Kry. Nou. Klaar.”

4. Priapisme

Dit het niks met urine te doen nie!

Die benaming kom van die Griekse god Priapus, wat rondgeloop het met ’n enorme, permanente ereksie … hoewel hulle ook sê hy was impotent, lelik en ’n vuilbek. (Hy was onder meer die bewaarder van manlike genitalieë, so ’n man moet seker nie te sleg van hom praat nie …)

Priapisme is skaars, maar ongemaklik is nie die woord nie. En pynlik: Sy ereksie wil nie sak nie. (Dit kan met jou klitoris ook gebeur. Dan word dit klitorisme of klitorale priapisme genoem, nou ja.)

Die oorsaak van priapisme is nie duidelik nie. Dit het vermoedelik te doen met bloedvloei- of chemiese probleme in die liggaam, of neurologiese of rugmurgtoestande en sekere antidepressante. Of dit kan die gevolg wees van middels wat in die penis gespuit word om ED te behandel, of in die pornografie-bedryf wanneer ’n man homself inspuit om langer te kan uithou ter wille van die kamera.

Komplikasies kan bloedstolling in die penis wees, skade aan die are, selfs gangreen. ’n Totale bôlsup …

Priapisme word gewoonlik gediagnoseer as die ereksie ná vier uur nog nie gesak het nie. (’n Man gaan nie vier uur wag voor hy dokter toe jaag nie.) En hoe gaan hy dit vir sy vriende verduidelik?

“Julle sal my nie glo nie, maar ek is in die hospitaal opgeneem met ’n ereksie.”

5. Anorgasme

Kan nie ’n orgasme kry nie.

Mans kan ’n probleem hiermee hê, maar nie sommer nie. Een stukkie statistiek sê een tot tien miljoen mans in die wêreld sukkel daarmee. Hulle bereik ’n orgasme tydens masturbasie, maar nie tydens seks nie.

Maar dis eerder ’n vroue-probleem. (Na bewering het een van die grootste seksgodinne van alle tye, ondanks drie mans en vele minnaars, nooit ’n orgasme in haar lewe gehad nie. Marilyn Monroe. Sy’t glo dié stukkie nuus met ’n vriendin gedeel.)

Volgens die Health24-meningspeiling van 2009 is net 1,85% van SA vroue anorgasmies. In Amerika is dit 10%. Kinsey het ook aangekondig dat 10% van alle getroude vroue nog nooit ’n orgasme gehad het nie. Maar dié twee syfers is problematies omdat die verskil so groot is.

Plaaslik net 1,85%? Wat is in Suid-Afrika se water of het iemand iewers verkeerd getel? (There are three kinds of lies: lies, damned lies and statistics – toegeskryf aan Benjamin Disraeli deur Mark Twain. Statistics are like bikinis. What they reveal is suggestive, but what they conceal is vital. – Aaron Levenstein.)

So, ’n rekenmeester, ’n makelaar en ’n statistikus gaan ’n bok jag. Die rekenmeester skiet 10 meter te naby. Die makelaar skiet 10 meter te ver. Die statistikus roep uit: “Ons het hom!”

Of miskien jok respondente bloot omdat hulle nie anorgasmies wil wees nie.

Baie vroue wat nié anorgasmies is nie kry in elk geval net 50-70% van die tyd ’n orgasme. En vroue met kinders trek aan die kortste ent: In ’n Britse studie (2010) is bevind vroue sonder kinders kry die meeste orgasmes (41%), teenoor net 12% van vroue met een kind. (Minder seks om mee te begin of net te moeg?)

Daar is drie soorte anorgasme:

1. Primêre orgasmiese disfunksie – die vrou het nog nooit op enige manier ’n orgasme gehad nie.

2. Situasiegebonde (situational) orgasmiese disfunksie – die vrou het al ’n orgasme gehad deur byvoorbeeld masturbasie of stimulasie deur haar maat, maar nie tydens seks nie. In een studie (1996) is bevind vroue se kans om “byna altyd” of “altyd” ’n orgasme te kry is beter wanneer hulle enkellopend is as in ’n verhouding.

3. Sekondêre orgasmiese disfunksie – het gereeld ’n orgasme gehad, maar toe droog dit skielik op.

Weer eens is die oorsaak dieselfde fisieke of sielkundige probleme. In 90% van gevalle is dit blykbaar sielkundig. Weer eens performance anxiety, verhoudingsprobleme met jou maat, of jou siening van seks, hoe jy grootgemaak is.

(“Siesa, moenie daar vat nie!”)

As dit vir jou ’n probleem is, tel die telefoon op: “Hallo, kan ek ’n afspraak by dr. Woelmuis kry? Nee, dis privaat …”

6. Vaginismus

Nóg ’n groot probleem vir sommige vroue (en hul mans, natuurlik, veral hul mans). Navorsingsresultate verskil hemelsbreed: Van 5% tot 47% van vroue sukkel glo hiermee.

Wêreldwyd het dermiljoene mense iewers elke sekonde van die dag heerlike, begeerlike seks – en hulle het geen benul hoe júlle voel nie …

Dis wanneer die spiere in die vagina in só ’n mate (onwillekeurig) saamtrek of in ’n spasma gaan dat penetrasie pynlik of heeltemal onmoontlik is. Dis juis die vrees vir pyn wat dit pynlik maak. Die gevolg is geen seks nie, soms jare lank.

Daar is vier grade van vaginismus, van nie so erg nie tot baie erg. Maar dis behandelbaar, emosioneel en ook fisiek, deesdae nogal met ’n soort Botox (botulientoksien).

◊◊◊

Soos jy sou agtergekom het, het die woord “antidepressant” al ’n paar keer hier voorgekom. Dit saai in die algemeen amok in jul sekslewe.

Sogenaamde SSRI’s (selective serotonin reuptake inhibitors) vat jou libido én jou orgasme weg. Dit kan mans ook laat sukkel. SSRI’s word onder meer ook voorgeskryf vir angstoestande, persoonlikheidsteurnisse, slaaploosheid. Ook vir premature ejakulasie, want SSRI’s vertraag die proses.

Weer eens: ’n Afspraak met jou dokter, hoe gouer hoe beter.

Mite 12: Grootte maak nie saak nie

Ja, en ja-nee …

As hy dit nog nie vir jou gesê het nie, mag jy dit nou maar weet: Daar is een ding wat ’n man die een of ander tyd in sy adolessensie gedoen het. Hy het sy skoolliniaal uitgehaal en sy penis gemeet. Êrens tussen klein en groot het ’n man al gewonder of syne nie te klein is nie. Dit kan lei tot ’n gróót onsekerheid. (Die één ding wat jy nooit moet doen wanneer jy ’n man se penis die eerste keer sien nie: Moenie lag nie.)

’n Man se perspektief op sy penis is gewoonlik van bo af (voëlperspektief?), wat dit kleiner kan laat lyk as wat dit werklik is, te meer as sy maag êrens in die pad is.

In 2002 het Hollandse uroloë vroue gevra hoe belangrik is die grootte van hul maat se penis. Vir 20% was die lengte “belangrik” en vir net 1% “baie belangrik”. Vir 55% was lengte “onbelangrik” en vir 22% “totaal onbelangrik”. Vir 21% was dikte “belangrik” en vir net 2% was dit “baie belangrik”.

Dit blyk dat dikte in die algemeen belangriker is as lengte. ’n Studie in 2001 het dit reeds bevestig: Vir 90% van vroue (hoewel dit ’n klein groepie van net 50 vroue was) was dikte bepalend vir seksuele genot, terwyl mans gewoonlik dink “lank” is gelyk aan “groot”.

Dis natuurlik nie.

Dis in elk geval net die eerste derde van jou vagina, skaars 3 cm, wat die gevoeligste is vir genot. Met enigiets meer kan jy streng gesproke nie veel doen nie. Boonop rek of krimp die elastiese wande van die vagina met behulp van die pelviese spiere sodat feitlik enige grootte penis sal “pas”.

In ’n internetstudie (2006) waaraan meer as 52 000 mense deelgeneem het, is bevind 85% van vroue was tevrede met die grootte van hul man se penis, maar net 55% van die mans self was tevrede daarmee. (Net 0,2% van die mans het gewens hulle s’n was kleiner.)

Hoe meet jy ’n penis?

Jy laat die man regop staan, mét ’n ereksie, parallel met die vloer. Dan meet jy aan die bokant, van die basis van sy penis tot by die punt. (Hy moenie sit of lê of so nie.) Die dikte meet jy deur die gemiddelde te kry van drie metings: om die basis, om die middel, en net agter die glans (kop).

Sommige navorsers meet dit deur die penis in die slap posisie uit te rek tot waar dit begin seermaak.

En dis nie ’n goeie voorstel om ’n man self te laat meet en terug te rapporteer nie, het navorsers agtergekom. Hy las gewoonlik ’n sentimetertjie of wat by. Daarom is internetstudies van dié aard enigsins onbetroubaar.

Hou ook die temperatuur in gedagte wanneer jy meet. Koue het ’n effek – noem dit die krimpvarkie-effek.

’n Penis is gemiddeld 12,9 cm lank, volgens die Amerikaanse vaktydskrif The Journal of Urology (1996). Die navorsers het ook opgemerk dat die lengte van ’n slap penis geen aanduiding is van wat kan gebeur as dit styf word nie. ’n Kleiner penis in die slap posisie raak dikwels net so groot soos ’n groter een in die stywe posisie, indien nie groter nie. (Dis hoekom jy nie moet lag nie, jy kan op jou neus kyk. Die Johannesburgse seksuoloog Elna McIntosh praat van showers en growers, “want wat jy sien, is nie noodwendig wat jy gaan kry nie”.)

Volgens die International Journal of Impotence Research (2000) is die gemiddelde lengte 13,6 cm, terwyl ’n studie deur ’n Amerikaanse kondoomvervaardiger (2001) getoon het dis 14,9 cm, met ’n afwyking van 2,1 cm alkante toe. Nóg ander waarnemers sê die gemiddelde lengte is tussen 13,9 en 15,7 cm.

In 2007 het navorsers gekyk na 12 soortgelyke studies in verskillende lande en besluit die gemiddelde lengte is tussen 14 en 16 cm en klaar, hou op stres.

In ’n Italiaanse studie (2001) is vasgestel ’n man se penis hou op met groei op 17 jaar, of moontlik vroeër. En dis so lank soos daardie penis gaan bly vir die res van die man se lewe. (Dieselfde geld jou klitoris.)

Wat van omvang/dikte?

In die 2007-studie is ook bevind die dikte van ’n man se penis is tussen 12 en 13 cm, met ’n gemiddelde van 12,3 cm. Navorsers aan die Kinsey-instituut het dieselfde bevind: 12,2 cm. Die kondoomvervaardiger se studie het ’n gemiddelde omvang van 12,6 cm getoon, met ’n standaardafwyking van 1,3 cm alkante toe.

Kortom (of lankom): In verhouding tot liggaamsmassa is ’n man se penis in elk geval gemiddeld die grootste in die diereryk. Grote gorillas is baie klein, en kleine sjimpansees baie groot.

Die langste penis wat amptelik aangeteken is, was in 1940 deur ene dr. Robert Latou Dickinson (dit was inderdaad sy van, no pun). Daardie penis was 34,3 cm lank en 15,9 cm in omtrek. Dis langer as ’n liniaal en dikker as die meeste stoelpote! (Daar is ook syfers beskikbaar uit studies oor die lengte van ’n man se penis wanneer dit slap is, maar wat gaan dít hom nou help?)

Ja, en ja-nee …

Mite 13: As jy wil weet hoe groot ’n man se penis is, kyk hoe groot sy skoene of voete is

Dis soos om te kyk hoe groot ’n vrou se mond is … Dit werk nie so nie.

Twee Londense uroloë het weliswaar hierdie mite getoets (2002) en te lig bevind: Geen statistiese korrelasie nie, ou Grootvoet.

Lang mans is ook nie noodwendig langer nie …