Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 25

Мәскәү йөзе төрле… Мәскәү йөзе —

Кара һәм ак, соры, кызыл, сары…

Белә микән моны Мәскәү үзе?..

Күптән эреп беткән инде кары.

Эреп беткән, бәлки, яумаган да,

Яңгыр гына коеп узганмыни?

Җир өстендә атлар аунаганда,

Шәһәр өстен каплар… тузанмыни?

Мәскәү эше хутта… Мәскәү эше —

Ак һәм кара учның өсләрендә.

Тышы бердер аның, эче, эче…

Күргән кебек тирән төшләремдә.

Җир өстендә, җирнең асларында

Көтү-көтү халык өерләре.

Мәскәүдән зур уйлар башларымда —

Хәтерләтә тынмас өермәне.

Мәскәү уе тирән… Мәскәү уе…

Бу уйларда безгә урын юкмы?

Ә узганда – томан кара-куе,

Утлы таба анда, таба – утлы.

Киләчәктән үткәннәргә таба

Бара юллар, бара, туктап тормый.

Кем ут йота, кем суык су каба —

Мәскәү колак салмый, муен бормый.

Йөз ел элек узганнарны таныйм —

Белә микән моны Мәскәү үзе?.. —

Меңәрләгән узгынчыга карыйм:

Күбесендә таныш татар йөзе!

Күбесендә безнең татар 100е!