Читать книгу Geloof sonder sekerhede - Anton van Niekerk - Страница 8

OP SOEK NA ’N MEER EIETYDSE GELOOF

Ons is mense van die 21ste eeu.

Ons wil glo op ’n manier wat nie lynreg indruis teen die insig van ons gesonde verstand en teen feitlik onbetwisbare getuienis van die wetenskap nie.

Van ons kan nie verwag word om ons intellek eenvoudig op te skort wanneer geloofskwessies ter sprake kom nie.

As mense van die 21ste eeu dring ons daarop aan dat ons geloof in God moet resoneer met ons breë intellektuele en kulturele oriëntasie …

Indien ons bly glo, wil ons dit doen op ’n manier wat aangepas is by, en nie voortdurend lynreg vloek teen die veronderstellings, insigte, waardes en verwagtings wat ons lewe vandag kenmerk nie.