Читать книгу Сүргэ көтөҕүү. Санааны кынаттыыр хоһооннор - Группа авторов - Страница 3

Көстө уларыйар тулалыыр эйгэм.

Түннүгүнэн чыычаахтар бииргэм

элэҥнээн олороллор. Онон

көтүтэн ааһаллар аттаах дьон.

Бүгүн тэлгэһэҕэ оҕо күлэр.

Бэрдьигэс хамсыы-хамсыы үүнэр.

Сарсыныгар оҕонньор бэрийэр

аарыма бэс анныгар илимин.

Кэм-кэрдии түргэнин!

Уйгу-быйаҥ халлаантан

Түһүө диэҥҥин сытыма,

Бириэмэни таах ыытан,

Халтай хаама сылдьыма.

Биир чаас, икки чаас —

Ааһар начаас,

Бэлиэр биир күн

Бүппүт бүгүн.

Арай бүппэт

Күннээҕи түбүгүҥ…

Олох – түгэн,

Түгэн – түргэн.

Олох-дьаһах бэйэттэн

Барыта тутулуктаах.

Онон барытын эрдэттэн

Толкуйдаан оҥоһуллуохтаах.

Биир чаас, икки чаас —

Ааһар начаас,

Бэлиэр биир күн

Бүппүт бүгүн.

Түбүктээх түгэн

Ааһара түргэн.

Олох – түбүктээх,

Түбүк – түмүктээх.

Барыта кыраттан саҕаланар,

Күүһүрэн, кыаҕыран чаҕыллар —

Уот кыымтан саҕыллар,

Олох түгэнтэн таҥыллар.

Биир чаас, икки чаас —

Ааһар начаас,

Бэлиэр биир күн

Бүппүт бүгүн.

Арай бүппэт

Күннээҕи түбүгүҥ…

Олох – түгэн,

Түгэн – түргэн.

Олох сырдык кэрчигэ —

Санаам сабын ситимэ,

Чыпчылыйыах түгэнэ,

Айар иэйиим үгэнэ,

Абыраллаах сүүрээнэ,

Аймалҕаннаах күүрээнэ.

Олох чаҕыл күлүмэ,

Доҕоччугум мичээрэ,

Долгуйара, үөрэрэ,

Оҕом омун үөрүүтэ,

Харыһыйа көрүүтэ —

Дьикти дьоллоох мүнүүтэ.

Олох сыччах биир чааһа —

Онно санаа ырааһа,

Дууһа иэйэр сылааһа,

Сүтэн эрэр сөкүүндэ,

Бүтэн эрэр мүнүүтэ,

Үйэлэргэ үөрүүтэ!

Түптэлэнэн түһэммит,

Түгэн тугун билбэппит,

Түргэтэтэ сатааммыт,

Төһөлөөҕүн көрбөппүт…

Түгэн – олох кэрчигэ,

Умнуллубат дьиктитэ!

Күнү өрөөмөҥ, өрөтүмэҥ,

Олох тэтимин бытаардымаҥ,

Саҥаны айар дьүккүөргүтүнэн

Кимэн иһиҥ туох баарынан.

Кэм кэмчи, бириэмэ кылгас,

Бүппүтэ эрэ баар буолуоҕа,

Эдэр сааспыт да чычырбас,

Эмиэ элэс гыныа турдаҕа.

Онон күҥҥүт баарына,

Күүскүт-уоххут баарына,

Түһэн биэриҥ, айыҥ-тутуҥ,

Оҥостуҥ кэлэр олоххутун.

Бүгүмэҥ бүтэй чуумпуга,

Суураллымаҥ хараҥаҕа,

Ол буолуо олох муудараһа,

Айымньылаах үлэ кыаҕа.

Сарсыарда, күнү кытта

Сыыдамнык ойон тураат,

Айыам мин олох бастыҥ

Ырыатын. Оннук, быраат!

Күнүм, быгаат, тэмтэйэ

Ойон тахсар халлааҥҥа.

Мин саныыбын: «Чэ, бэйи,

Күнүс ордук тахсыаҕа».

Күнүһүн олох дуолан

Түбүгэ илдьэ барар:

– Чэ, бээ! Киэһэ, быыс булан,

Суруйуллуо, – диэн буолар.

Онтон киэһэ, барыҥый

Ууну, тыаны сабыыта,

Сылайбытым баһырхай:

– Хааллын олох ырыата…

Ол курдук устан ааһыа

Өйдөппөккө олоҕуҥ,

Айыаҥ суоҕа, баттаһан,

Бастыҥ ыра ырыаҕын.

Ойон тур күнү кытта.

Уонна күүскүн баттаһа,

Уһаппакка ай, таптаа —

Ол – олох муудараһа.

Утуйуом тугу да гыммакка —

Бу дьоллоох мичээрбин соппокко,

Эйигин кытары биир күнүм

Алтыспыт үөрүүтүн тыыппакка.

Суоҕу баар кэриэтэ саныахха —

Дьолу да оҥорон көрүөххэ.

Бүгүҥҥү түбэһэ түһүүнү

Дьылҕаттан бэлэх дии саныахха.

Ардыгар улуу да ырыаны

Аҥаардас биир этии күүһүрдэр.

Ол курдук чуҥкук да олоҕу

Соҕотох биир түгэн киэргэтэр…