Читать книгу Veearts-vriende: Tania en die towerfluitjie - Helen Brain Nicky Webb Rico Schacherl - Страница 5

Aboo, die Bokserhondjie

Tania het haar ma se onderklere net gered en Vlooie in die agterplaas toegemaak toe ’n wit motor by die parkeerplek inry.

“Hallo, meneer Kumar,” groet Tania. Die bejaarde man is een van Arabella se gunstelingkliënte, en die eienaar van Aboo, ’n jong, spelerige bruin en wit bokser.

Meneer Kumar is na aan trane toe Tania die motor se deur vir hom oopmaak. “Daar’s iets verkeerd met Aboo,” sê hy. “Hy lê net heeldag. Hy staan glad nie op nie. Ek weet nie of hy dalk raakgery is of iets nie – maar ek verstaan nie hoe hy oor die hoë muur kon gekom het nie. Hy’s hier agter in die kar, maar ek kan hom nie alleen optel nie. Hy’s te swaar.”

“Ek roep vir Unathi,” sê Tania.

Tania hou die deur oop en Arabella se assistent, Unathi, dra die bokser binnetoe. Sy is geskok om te sien hoe anders hy lyk. Hy lê net slap in Unathi se arms.

Arabella kom dadelik by haar spreekkamer uit. “Kom in, kom in,” sê sy. Sy streel Aboo sag terwyl Unathi hom versigtig op die tafel neersit.

Unathi maak die deur toe en gaan terug na die hokke. Tania weet sy moet haar huiswerk doen, maar sy hou haar by die kennisgewingbord besig. Sy wil eers hoor of Aboo oukei sal wees.

’n Paar minute later gaan die spreekkamer se deur weer oop. “Ek sal die bloedmonsters wegstuur,” sê Arabella vir die ou man. “Ons sal die resultate oor ’n paar dae kry. Ek bel jou sodra ek dit het.”

Meneer Kumar se oë is weer vol trane. “En as hy iets ernstigs makeer, wat dan? Sal ons hom moet uitsit?”

Tania snak na asem. Nie Aboo nie!

“Ons steek daardie brug oor wanneer ons daarby kom,” sê Arabella. “Hou hom voorlopig warm en gemaklik. Maak seker jy voer hom die pille wat ek vir jou gegee het. En bel my enige tyd, dag of nag, as jy bekommerd is.”

Tania wil huil toe Unathi vir Aboo terug motor toe dra. Dis aaklig om te dink so ’n pragtige jong hond se lewe gaan dalk kortgeknip word omdat hy nie meer kan loop nie.