Читать книгу Hüttenadvent - Herbert Gschwendtner - Страница 13

Kimmt im Herbst de koite Zeit,

dann is vorbei mit da Gmüatlichkeit,

wann des Keiwiwerch wieder kimmt

und de Küah, de ma vo da Alm ababringt.

Um de Zeit weads im Stoi wieder eng

und es gibt um de bestn Platzl a Gedräng.

D’Fliagn wean a wieder gach amoi mehr,

deswegn fliagn de Kuahschwänz hin und her.

Mit der ganzn Friedlichkeit is vorbei,

weil irgendoans plärrt de mehra Wei.

Irgend a Kettn scheppert oiwei am Barrm,

aba durch de Viecha is im Stoi sche warm,

drum kemman de Katzn wieder gern herei.

A Lacki Müch gibts für de Viecher oiwei.

Dann de Goaß, de ganze Zeit de Meckerei.

Und a da Bock, sei Geruch is neama nei.

Nix dro an de Viecha wia Hörna, Haut und Boa

und vastrahn eane Kügei in da ganzn Gmoa.

Vom Goaßstoi a poa Meter weit weg

liegn de foastn Fackn in eanan Dreck.

Se grunzn vor eana hi den mehran Tag

und wean beim Fuattan erscht zur Plag.

Da schmatzns wia nit gscheit und fressn,

ham vor Gier jede Freindschaft vagessn.

Auf d’Nacht huckn de Henna auf ean Stangl

und gackern elendlang eana Leiergsangl

und machn zeitweis a murds a Gschroa

um eana grad erscht frisch gelegtes Oa.

Außer dem Platzgeranggl auf da Stang

dauert der Frieden oft amoi recht lang.

Aba wann de Bäurin ihr Pulli, Pulli schreit

weads fürn Hennawettlauf höchste Zeit.

Da Hals wead doppelt lang, de Flügl broat,

dawei de Bäurin mit de Fuattakörndl wart.

Bevor dann der Schnee vom Gebirg abaruckt

wead im Stoi des letzte Moi zsammagruckt.

Da kimmt dann mit a großen lauten Geplärr,

übern Winter des ganze Schafewerch daher.

Eh glei laare Fresser, fast nix zan hoin,

ois wia de beissende und grobe Wolln.

Alle müassns zsammruckn in da koitn Zeit,

weil ma miteinanda leichter de Kältn daleit.