Читать книгу ТАНЛАНГАН АСАРЛАР - - Страница 38

Қуёш чодир тикиб само тагига,

Зангор уфқларга зар юргизармиш.

Илҳом янглиғ бедоғ кўк юксагига

Олтин ўтлоқ тасвирини чизармиш.

Оқшомда қўлидан тушиб қалами,

Ётоғига ҳорғин қўяр эмиш бош.

Чизиб битиролмай жаннат далани,

Буюк армон билан сўнармиш қуёш.

Қўшиққа кўчириб нур таъсирини,

Содиқ қолиб қуёшнинг ғоясига

Зумрад чаманларнинг шўх тасвирини

Шоир етказармиш ниҳоясига.

Гар кўкка боқсангу, олтин мовийлик

Қаршингда юз очса зар ўтлоқ бўлиб,

Тозалик уфурса шу самовийлик,

Бунда – қуёш эмас, шоирнинг қўли.