Читать книгу Казан – Мәскәү / Казань – Москва - Ленар Шаех - Страница 94

Күңел поэзия эзли

Таш диварлар арасыннан.

Асфальтланган юллар буйлап

Шигырь чабып бара сыман.

Күңел җилли… Илһам эзли

Рельслар тимереннән.

Трамвайдан шигырь көтеп,

Меңенче кат тилмерелгән.

Күңел – яңгыр… Ул гамь эзли

Йортның калай түбәсеннән,

Асты өскә китерелгән

Бөек ханнар төрбәсеннән.

Күңел – ак кар… Ул моң эзли

Ипподромнан, стадионнан…

Шигырь түгел, дөнья чаба,

Мәшәкатьләр бара аннан.

Күңел поэзия эзли

Ярылган таш арасыннан.

«Ташгырь» төяп, «тимгырь» килә –

Илһамланмый карасыннар!