Читать книгу Bruistablette vir die lewe - Susan Coetzer - Страница 40

Deursigtigheid

’n Stad kry ’n goeie naam wanneer opregte mense dit prys, maar dit word afgebreek deur wat goddelose mense daarvan sê.

– Spreuke 11:11

Deursigtigheid is vir die Here baie belangrik. Tog is daar ’n stygende tendens by mense om ongerymdhede toe te laat, ter wille van selfbehoud en vooruitgang. Hulle verweer is dat álmal dit doen.

Suid-Afrika is gedurig in die nuus oor korrupsie en omkopery tot op regeringsvlak. Dit laat ’n onaangename stigma aan ons land kleef. Het jy dalk onbewustelik aangesteek by hierdie onaanvaarbare manier van doen en dink?

In my groeiende verhouding met die Here raak ek al hoe meer oortuig dat deursigtigheid ’n leefstyl eerder as ’n stel reëls en regulasies is. Dit kan nét vloei vanuit ’n diep verbintenis met die Gees van waarheid. Gereelde check-ups by die Here oor wie en wat jy regtig is, is nodig. Want deursigtigheid is soveel meer as om nie (geld) te steel of (te erg) te lieg nie.

Sou jy sê jy is ’n oop boek – wat jy sien is wat jy kry? Is deursigtigheid ingeweef in jou hele karakter en daaglikse optrede? Is dit ingegraveer op jou gewete, in jou huwelik en jou verhouding met geld?

’n Deursigtige mens konkel nie agter ander se rug nie, leef nie volgens dubbele standaarde nie, aanvaar nie omkoopgeld nie, het nie verskuilde motiewe nie, dra nie skaapklere om die wolf te vermom nie en belowe nie vandag iets en vergeet môre al weer daarvan nie.

Dubbele standaarde en ongerymdhede wat toegesmeer word, is dodelike gifpille wat ’n hele volk tot ’n val kan bring. Vra die Here om jou gees te suiwer en jou deursigtig te maak sodat jy ’n bruistablet vir ons land se genesing kan wees.

Bruisgebed vir deursigtigheid: Here, help my om ’n oop boek te wees voor U en voor alle mense. Tot eer van u Naam.