Читать книгу Jukstaposisie - T.T. Cloete - Страница 7

vanaf die glansende dun horings en die gesig

puntig verfynd uit oor die lig geboë rug

tot in die stertkwassie spigtig

gelig af in die glasbreekbaar

dun bene pronk waaierhaar

die springbok nael met die speer

se vaart wip met die haarveer

se spanning hoepel

soepel

onder die leeu majesteitlik veilig

en gevrees pragtig

onder sy gewig

vouknakval

die springbok met ’n klapknal

breek hy die bene en rug en maak prooi

van elegansie wat argeloos mooi

is lê en spartel

voor die gewelddadige mooi wat aanskoulik martel