Читать книгу Яктылык сулышы = Дыхание света - Альфия Ситдикова - Страница 48

Кара төс тә кайчак җанга якын,

Ул да бизәк-чигеш аклыкка.

Тормыш та бит түгел гел саф алтын,

Ак-карадан тора хаклык та.

Табигатьтә төсләр алышына,

Яз артыннан килә ямьле җәй.

Торна моңы! Гомер агышына

Ак карлардан кышка җәймә җәй!

Назлап сыйпый кулым балаларның

Ефәк кебек кара чәчләрен.

Җилләр сөртеп ала болытларның

Түгелергә торган яшьләрен.

Искәртә лә чал чәчләрнең төсе –

Көтә алда гомеремнең көзе.

Моңнар чыңлый җанда, моңнар чыңлый…

Гомер агып бара тын гына.

Күпме сагыш минут тынында.

Чаларган карт дәвер шавын тыңлый.

Яшьлек белән картлык очрашкан мәл,

Дулкын белән дулкын кушылган,

Югалттым, дип, язган һушыннан.

Узган гомеркәйләр бигрәк жәл.