Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 13

Иярсез ат кебек чабып узды

Иң бәхетле чагы гомернең.

Мин бит синдә каткан ипи белән

Белем ташын бергә кимердем.

Салкын чәй дә булды,

кайнар чәй дә, —

Авыз пеште, өреп эчмәгәч.

Ап-ак колонналар арасында

Шыгыр-шыгыр килде тәгәрмәч.

Гомер тәгәрмәче,

Яшьлек тәгәрмәче,

Студент тәгәрмәче иде ул.

Бу көннәрнең иң-иң кадерлесен,

Иң яктысын үзенә җыйды ул.

Алган белем артык күп тә түгел,

Бер чемодан икән нибары.

Миннән күпкә акыллырак, беләм,

Универның ап-ак дивары.

Җыйган белем бер чемодан гына,

Хатирәләр ничә чемодан?!

Юкка гына энҗе бөртегедәй

Сайлап-сайлап кына җыймаган.

Ленины да, Толстое да шунда,

Ап-ак колоннадан тузан да…

Синең яннан гомер тәгәрмәчен

Шыгырдатып кына узганда,

Бер дәшәрмен, елмаермын әле,

Син танырсың мине, танырсың!

Ап-ак горур колонналар белән

Күңелемә кереп калырсың!