Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 6

Зәңгәр күкнең упкын-дулкынында

Тургай булып җаным атына.

Кайда, диеп мине сорамагыз —

Мин бәхетнең өске катында.

Бар йөрәгем кубарылып тибә,

Мәхәббәткә күңел талпына.

Әллә кайда диеп уйламагыз —

Мин сөюнең өске катында.

Әллә кайда түгел, монда гына,

Мин хыялның уйнак атында.

Әйдә бергә, сез дә соңламагыз —

Мин хыялның өске катында.

Ак болыттай ак уйларга чумып

Басып торам дөнья чатында.

Кая китте, диеп сорамагыз —

Мин яшәүнең өске катында.