Читать книгу Abel se lot - Chris Karsten - Страница 8

Langs ’n hoop kleigrond leun vier munisipale werkers op hulle pikke en skopgrawe, stewels aangepak van rooi modder. In geel plastiekreënjasse, kappies oor die kop, op die rûe geëmbosseer PARKS & RECREATION. Hulle werk is eers klaar, nou rus hulle en rook bakhand, nat en bedremmeld, maar tog nuuskierig.

Die twee pikslaners het die aanvoorwerk vir die gat gedoen. Ondanks die reënbui is die grond dig en hard gekompakteer van jare se onversteurd lê. Die twee met die grawe het die los grond met swierige, gemaklike hale buitentoe geskiet, uitgeklim, opsy gestaan, weer die pikslaners laat inklim. Al hoe dieper terwyl die hoop grond langsaan groei.

Met die eerste druppels uit die loodgrys lug is die grawery gestop, ’n afdak van seil laat kom, op aluminiumpale oor die gat opgeslaan om die reën weg te keer. Die vier manne met hulle pikke en grawe het beurtelings in die gat teruggeklim en hulle werk hervat, dankbaar vir die skuiling.

Hulle toesighouer het onder beskerming van die seil aan sy koffie geslurp en sy gewig kort-kort van een been na die ander verplaas. Op die gestipuleerde twee meter het die groepie onder die seilafdak gehoor hoe ’n graaf ’n harde voorwerp tref. Die opsigter het die termosfles se plastiekbeker effe laat sak, vooroor geleun vir ’n kykie in die gat af, die twee grawers kortaf vermaan: “Pas op.”

Nou is die graf oopgegrou, die kis ontbloot.

In ’n groot vierkant om grafte in hierdie ou deel van die begraafplaas het die polisie ’n plastiekbanier gespan met die waarskuwing: NO ENTRY – CRIME SCENE. Die opsigter meen die banier met die herhalende bewoording is erg oordrewe. Dit is sý begraafplaas, en in sý heilige domein is g’n misdaad gepleeg nie. Hierdie is g’n misdaadtoneel nie, net ’n sensitiewe, selfs roerende, operasie om ’n kis te herwin. Sonder die teenwoordigheid van enige naasbestaandes op hierdie triestige laatmiddag.

Sy blik dwaal oor die grafte heining toe. Die kolonel was baie beslis: niemand word binne toegelaat terwyl die grouery aan die gang is nie. Daarom staan hulle buite die begraafplaas, al langs die draadheining en sipresse: die karre en die nuuskieriges. Beduie met die vinger na die doenigheid tussen die grafte, wonder wat presies aangaan, fluister onderlangs, want die oopgrou van ’n ou graf verdien respek.

Onder die afdak word, ook met gedempte stemme, beraadslaag oor die volgende stap. Die opsigter skiet die droesem uit sy beker anderkant toe, vryf met ’n duim oor die stoppels aan sy ken. Hy staan effe eenkant, nie deel van die gesprek nie. Sy werk is om gate te grou en weer toe te gooi. Wel, toe te sien dat sy arbeiders dit doen. Vir sy werk hoef hy hom nie elke oggend te skeer nie, miskien op ’n Maandagoggend, en dalk weer Vrydag, voor die naweek. In sy wendyhuis by die ingang van die begraafplaas ontvang hy selde besoekers; hy meng nie met die treurendes wat hulle afgestorwenes ter ruste kom lê of kom besoek nie.

Hy skroef die termos se beker terug, beloer die skraal figuur wat eenkant staan, half onder die seil uit. Asof sy onbewus is van die motreën, of dalk gee sy net nie om nie. Kort, nat hare, druppels wat blink oor haar wange afgly, langs haar neus, teen haar keel en nek af.

Hy was verras, ’n paar maande terug, toe die jong speurder van moord-en-roof uit die stad by sy kantoor onder die sipresse opgedaag het. Vrou, nogal, en in die etensuur sonder afspraak. Kortaf die grafregisters geëis, en sy stoel. Terwyl sy na name en grafnommers gesoek het, moes hy staan-staan by die deur sy Marmitetoebroodjies en koffie afsluk. Halfvyf het hy opgepak, en sy was steeds tussen die grafte met haar kamera en notaboek.

En hier staan sy nou soos ’n natgereënde hoender. Neem nie aan die gesprek onder die seil deel nie, vingers strelend oor haar maag. Tuur afgetrokke in die oop graf asof sy die inhoud van die houtkis probeer peil.

Sy blik verskuif na die groot polisieman met die growwe stem. Statuur, stem en snor, dink die opsigter, van ’n man wat nie kak vat nie. Duidelik in beheer van die ongewone verrigtinge.

Die opsigter luister met verdeelde aandag na die dilemma wat die polisiemanne met die twee begrafnisondernemers bespreek. Hy haal sy selfoon uit sy broeksak, loer skelm. Dié lui selde, maar dis handig wanneer die alarm hom verwittig dat die etensuur aangebreek het, of huistoegaantyd. En die vogtige lug sit juis in sy litte, bring die pyne in sy voet, in sy hamertoon. Vanaand moet die vrou weer die jigsalf invryf.

“Die kis is erg verweer,” sê die ouer begrafnisondernemer. “Dennehout, en onvernis. Al begin verrot van die klam grond en boorwurm.”

Die opsigter kén meneer Poppe Senior met sy lang, dun nek. Al ’n goeie veertig jaar in die lykbesigheid, byna so lank as wat hy opsigter is. Ken ook die een neffens hom, sy seun, meneer Poppe Junior. Bietjie van ’n windhol na die opsigter se smaak. Glo ’n ekspert met balseming. Het in Mississippi gaan studeer, State Institute for Embalmers and Morticians, spog meneer Poppe Senior graag wanneer hy ’n graf kom inspekteer voor ’n teraardebestelling. Hy moet seker maak dat die spesifikasies van die gat aan munisipale vereistes voldoen.

Die opsigter weet nie waar Mississippi is nie, vra nie uit nie, stel nie belang nie.

“Ons kan nie die hele dêm middag hier staan en redekawel nie,” sê die polisieman met die snor; hy word aangespreek as kolonel Sauls. “Wat stel julle voor? Julle is die kenners.”

Meneer Poppe Senior en Junior se maer koppe leun na mekaar oor. Die opsigter loer weer na die tyd op sy selfoon. By die hoop rooi, modderige grond trap die pikslaners stompies dood, die grawers verskuif op hulle graafstele.

“Ons het ’n plan,” sê meneer Poppe Senior.

Die vrouespeurder, sien die opsigter nou, het ongesiens beweeg tot waar die kopsteen uitgehaal en plegtig neergelê is voor die eerste pikhou. Ook sy kyk afwagtend op na die twee ondernemers met die plan. Albei is in swart pakke, wit hemde, grys dasse styf om die dun nekke, elk met ’n oopgeslaande swart sambreel in die hand.

“Ja?” Die kolonel klink kortgebaker.

“’M … is ek nog hier nodig?” vra die opsigter.

Gesteurde trek in die oë toe die kolonel na hom omkyk.

“Nee. Ons sal laat weet wanneer jou manne die graf weer kan opvul. Miskien oor ’n week of so.”

Die opsigter wink met ’n kopknik sy vier grafgrawers, hoor met die wegstap die diep stem sê: “So, wat’s julle plan om die kis uit te kry?”

Adjudant Ella Neser kyk hoe die opsigter en sy span wegstap, die fles in sy hand swaaiend langs sy been, kop nekloos ingetrek in die kraag van sy reënjas, ’n effense hink in sy tred asof sy skoen hom druk. Sy vee ingedagte met die agterkant van ’n hand oor haar nat voorkop, voel hoe haar bloes koud aan haar vel kleef. Sy kan daardie middag goed onthou toe sy by die wendyhuis ingestap het. Sy onthou die bonsing in haar bors, die bewing in haar vinger wat onder ’n inskrywing in die grafregister vasgesteek het.

Sy het die graf gekry van die ma van die reeksmoordenaar na wie sy soek. Dit was ook laatmiddag soos nou, maar ’n warm, droë dag, en winderig, en sy het toe geen spesmaas gehad van die verskriklike en noodlottige effek wat haar besoek aan hierdie graf tot gevolg sou hê nie.

Haar hand glip teen haar nat bloes af. Sy het in die afgelope maande ’n hebbelikheid aangeleer. Wanneer sy iets bepeins, streel sy met ’n vinger aan die regterkant van haar middel af, laag oor haar maag, oor die vae wit operasieletsel van toe haar blindederm op twaalf uitgehaal is. Dit het haar voorheen nooit gepla nie, maar nou is haar maagvel bederf met nuwe letsels, en dié het nog nie vervaag nie. Dit is nie weens ’n irritasie dat haar vingers die wondvel koester nie, dis asof hulle instinktief die letsel opsoek wanneer sy aan hóm dink. Aan Abel Lotz. Soos nou hier by die graf.

Die graf wat haar gelei het tot die ontmoeting in sy kombuis, die gebeure in haar geheue vasgelê. Toe sy opgekyk en hulle oë mekaar ontmoet het. Daardie blik tussen hulle, toe albei gewéét het: die jagter en die gejaagte het mekaar gevind. En sy vir ’n oomblik verlam was, soos ’n muis deur die oë van ’n slang.

Sy hand kan sy onthou, toe dit uitskiet om haar kop teen die porselein van die ou wasbak te kraak. Die lem van sy skalpel teen haar maag het sy nie gesien of gevoel nie, net die gevolge toe sy bykom. Die nuwe littekenweefsel is steeds dieppers en opgehewe, die proses van heling nog aan die gang. Soms jeuk dit, maar nie meer so erg as vroeër nie.

Ella hoor die knorrigheid in Silas Sauls se stem.

Meneer Poppe Senior hoes amegtig voor hy sê: “Ons sal die nuwe katrolraam oor die graf opstel. Soos vir ’n begrafnis. Nie om ’n kis te laat sak nie, maar om hierdie een op te hys. Die katrolraam is ontwikkel met ruimtetegnologie, van titaan, in Mississippi ver- …”

“Bring dit!” beveel kolonel Sauls.

“Die bodem sal ons stut sodat sy nie uitval nie. Ons wil haar nie in die graf agterlaat nie, nè, kolonel?”

“Nou toe, waarvoor wag julle?”

’n Nuwe hoesbui. Meneer Poppe Senior vee die fleim met ’n groot wit sakdoek van sy dun lippe af.

Hy staar die grafgrawers agterna. “Wie moet inklim?”

“In die graf in?” Meneer Poppe Junior buk, vee met sý wit sakdoek oor die modderspatsels aan sy swart skoene, poets die blinkleer. “Iemand moet inklim om die stut en bande onder die kis in te kry.”

“Fred,” sê kolonel Sauls vir die ander speurder. Dié het op die opsigter se staanplek ’n sigaret gaan aansteek.

Luitenant Fred Lange druk ’n duim en voorvinger in sy mond, fluit skril. Die opsigter en sy span steek vas, kyk terug graf toe.

“Nog nie klaar nie!” roep Fred. “Nog iets waarmee julle moet help.”

Uit die lykswa op ’n inrypad tussen die grafte bring Poppe-pa-en-seun self die katrolraam met sy breë nylonbande nader. Hulle stel dit versigtig oor die graf op.

Ella kyk weer af na die kopstuk. Dit lê eenkant, die reëndruppels soos kwiksilwer op die gepoleerde graniet.

Dorkas Johanna Lotz (née Linde), 11.12.1930 – †11.08.2005. Rein is ek, sonder oortreding; suiwer is ek, en daar is geen skuld by my nie. – Job 33:9.

Nie gesondig nie, dink Ella, maar die lewe geskenk aan Abel, die kind wie se gees sy kon brei en formeer en boetseer soos klei. Nie gesondig nie? Net ’n fokken monster geskep. En dis nie hiperbool nie, dit wéét sy uit eie ervaring. Die bewyse, die letsels, is aan haar liggaam, in haar vel ingekerf.

Sy is net vaagweg bewus van die gewerskaf in die graf, hoor die opdragte van die menere Poppe aan die twee grawers. Natuurlik is die begrafnisondernemers nie ingelig oor die rede waarom Dorkas Lotz se kis opgegrawe word nie. Ella vermoed hulle sal graag wil weet, maar hulle vra nie uit nie. Die lasbrief vir die opgrawing het meneer Poppe Senior sorgvuldig bestudeer, sy kop geknik en dit geliasseer. Dit is net gepas dat sy onderneming die opgrawing doen, aangesien hulle destyds die gestorwene hier ter aarde bestel het. Hulle sal ten beste weet hoe om die kis en sy inhoud te hanteer.

Die menere Poppe hoef ook nie te weet dat dit byna twee maande geduur het voordat die aansoek om ’n lasbrief uiteindelik goedgekeur en deur die hooflanddros self onderteken is nie. Selfs met grondige redes en motiverings wou die landdros homself eers vergewis dat die polisie inderdaad geen naasbestaandes van die oorledene kon opspoor oor die opgrawing van die kis ná byna ses jaar nie.

Ook Interpol se hulp is ingeroep om die enigste bekende naasbestaande – Dorkas se seun, Abel – te probeer opspoor. Nie net vir sy instemming dat sy ma se graf oopgemaak kan word nie, maar omdat hy gesoek word as vermeende reeksmoordenaar. Onverrigtersake het die landdros oplaas die lasbrief onderteken.

Nou word die kis met groot gesukkel uit die graf gelig.

“Dis swaar,” sê meneer Poppe Senior, gebukkend oor die katroltakel.

“Sy was ’n swaar vrou, as ek reg onthou,” sê meneer Poppe Junior.

Ella kyk na die graf links van Dorkas s’n. Die inskripsie op die kopsteen lui:

Johanna (Hannie) Maria Linde (née Yssel), 24.05.1893 – †16.03.1981. En kyk, daar was ’n vaal perd. En hy wat daarop sit, sy naam is die dood, en die doderyk het hom gevolg. – Openbaring 6:8.

Ma en dogter, weet Ella nou; die raaisel is opgeklaar. Abel se ma en ouma, wat húlle delusies in die seun se ontvanklike gemoed oorgeplant en besete versterk het.

“Maar hoeveel jaar is dit al?” steun meneer Poppe Senior. “Hoe kan sy steeds so swaar wees? Net skelet en beendere, en wat weeg dít, ’n hopie bene?”

“Ek moes haar balsem, onthou,” sê meneer Poppe Junior, balsemdeskundige van Poppe & Son Undertakers & Embalmers van Fordsburg, Johannesburg.

“O ja, dis wat haar seun wou hê. Sy ma moes gebalsem word sodat sy vir ewig behoue kon bly.”

“Hier kom sy nou op,” waarsku meneer Poppe Junior.

Ella draai om graf toe. Die kis verskyn, rustende op die sterk bande van die hystoestel, purper valle om die kante gedrapeer.

“Vat dit staatslykhuis toe,” sê kolonel Sauls.

“Maar ons kan dit daar by ons gaan oopmaak.” Meneer Poppe Junior is onthuts.

Ella merk die teleurstelling. Besef Junior, self al in sy sestigs, sal ’n lit van sy linkerpinkie gee om sy handewerk te aanskou, as’t ware sy balsemtegnieke-in-aksie te bestudeer.

“Dokter Koster wag al,” sê kolonel Sauls.

“Wat moet dokter Koster met die liggaam maak?” vra meneer Poppe Junior.

“Hy moet ’n regsgeneeskundige verslag opstel; dis wat forensiese patoloë doen. Vat die kis, ongeopen, staatslykhuis toe. En dankie vir julle hulp.”

Meneer Poppe Senior kug en skud sy kop. “Steeds so swaar. Sy moes al ligter gewees het, verdroog, net vel en been.”

“Ons sal die rekening stuur,” sê Junior.

“Laat weet wanneer ons haar weer ter ruste moet lê,” sê Senior. “Dis ’n sonde om ’n liggaam so te versteur.”

Rein is ek, sonder oortreding, geëts in Ella se gemoed.

“Ek soek ’n wag hier, Fred,” sê Silas. “Deurnag. ’n Patrollie-voertuig van die plaaslike polisiesektor. Geen getjommel van agies en joernaliste om die grafte nie. Ek wil respek hê vir die mense wat hier lê. Dis ’n begraafplaas, nie ’n dêm sirkus nie. En ’n misdaadtoneel, so hou hulle weg. Kom, adjudant.”

“Dis nie eintlik ’n misdaadtoneel nie,” sê Fred Lange.

Langs haar steek Silas vas, draai na Fred toe.

O moer, dink Ella. Hier kom dit! Fred met sy groot bek.

“Wil jy nou hare kloof, luitenant?”

“Sê net, kolonel … Tegnies is hier nie ’n misdaad gepleeg nie.”

When you’re in a hole, Fred, don’t dig, dink Ella met ’n tikkie behae oor die hou wat die ou hand op die krop moet vat. Met ’n beneukte kolonel Sauls is jy nie ’n wysneus nie.

“Sê jy dis nie ’n misdaadtoneel nie, eintlik net ’n toneel wat miskien verband kan hou met ’n misdaad? Is dit wat jy wil sê? Is jy ’n dêm wysneus, Fred?”

“Nee, kolonel.”

“Nee wát?”

“Ek sal twee konstabels van Doradopark opkommandeer, kolonel.”

“Dan’s dit reg, Fred.”

“Hoe lank sal dit vat, kolonel? Tot wanneer moet hulle die graf oppas, kan ek sê?”

“Dit vat so lank as wat dit vat. Tot ons klaar is. Dra dit so aan hulle oor.”

Ella buk agter Silas onder die polisiebanier deur, kry koers na die wendyhuis. Die opsigter, termosfles onder ’n arm vasgeknyp, leë Tupperware-houer in die hand, is hinkend op pad na sy kar onder ’n sipres.

“Niemand kom by daardie grafte wat afgebaken is nie,” beveel Silas. “Nie eens naasbestaandes nie, gehoor. As iemand wil kom blomme neersit, bel jy my eers. Of vra die polisiewagte om my te bel.”

Die opsigter frons. “Maar ek kan mense tog nie van hulle grafte weghou nie.”

Hemel tog, dink Ella. Kan mense nie sien die leeuhok is oop nie? Hier kom dit wéér!

“So, jy’s van plan om ’n polisie-ondersoek te bedonner?”

“Nee, maar …”

“Dis wat jy sê. Jy sê jy gaan jou nie aan my opdragte steur nie.”

“Dis nie …”

“Nie? Wat sê jy dan?”

“Niemand sal by daai grafte kom nie, kolonel.”

“Goed. As iemand soontoe wil gaan, dan bel jy my. Of jy bel vir adjudant Neser. Dis adjudant Neser hier by my. Jy’t ons nommers en jy’t ’n sel. Jy bel dadelik, summier, pronto, veral as ’n man hier aankom met ’n bos blomme wat hy op mevrou Lotz se graf wil gaan sit.”

In die kar sê Ella: “Jy dink tog nie hy’s terug nie, kolonel? Dink jy hy sal so vermetel wees om te kom kyk wat hier aangaan?”

“Van Abel Lotz verwag ek enigiets. Hy’s nie rasioneel nie. En kry die video wat die polisiefotograaf van die nuuskieriges by die begraafplaas geneem het.”

“Ek’s op siekverlof, kolonel.”

“Kyk daarna. Bestudeer elke gesig, kyk of jy Abel Lotz herken, of iemand wat soos hy lyk.”

Is hy doof, of ignoreer hy haar bloot? wonder sy.

“Ek’s op siekverlof, kolonel. Mag nie werk nie.”

“En doen dit sommer vanaand al.”

“Hy’s landuit. By Komatipoort oor die grens Mosambiek in. Sit iewers in Afrika.”

“Byna twee maande al? Hy’s nie daai soort nie.”

Nee, dink Ella, Abel is onlogies, nie van daai soort nie. Hy sal sy ma kom opsoek, al is dit net haar graf. Sonder sy ma is hy verlore.

Hulle ry deur die verlate landelike strate van Doradopark, neem die oprit na die R82 noordwaarts Johannesburg toe. Vyftien kilometer verder steek hulle die lykswa van Poppe & Son verby, teen gewyde spoed met die modderige ou kis sigbaar agter die groot glaspanele. Junior agter die stuurwiel, pa en seun albei kiertsorent, yl vaal hare plat teen hulle skedels.

Ongetwyfeld in diepe diskoers, dink Ella in die verbygaan, oor die wondere van meneer Poppe Junior se balsemtegnieke. En oor die voordele van langtermyn- bo korttermynbalseming, veral as mens in ag neem dat daar uit arme Dorkas Lotz se dennekis agter hulle g’n snuffie van ’n reuk is nie. Miskien redeneer hulle selfs oor die moontlikheid van ’n balsempatent wat in die Dorkas-geval opgesluit lê. As hulle net die geleentheid gegun sou word om die kis oop te maak en haar van naderby te bekyk, te betas, te prik, selfs ’n klein snit te maak om die gepreserveerde weefsel te ondersoek!

“Waar sou hy wegkruip?” wonder Ella hardop.

’n Retoriese vraag; sy verwag geen antwoord nie. Die vraag in die gemoed van elkeen wat Abel se handewerk in die ou huis in Doradopark aanskou het. Dit blý spook.

“Hy kan nie vir altyd vlug nie,” sê kolonel Sauls.

Die werk van die reeksmoordenaar wat die Nagsluiper gedoop is, is nie die grootste stel reeksmoorde in die land se misdaadgeskiedenis nie. Verreweg nié, net vier slagoffers. Ook nie die ergste nie. Geen ledemate of geslagsdele is vir moetie afgesny nie, of die slagoffers gemartel in ’n uiting van woede en frustrasie of in perverse seksuele dade wat sulke moorde kenmerk nie. Wel vreemde rituele. Abel Lotz se gekwelde gees is ’n raaisel.

“Ek sal hom kry,” sê Ella. “Waar hy ook al is.”

Dit was haar eerste saak as ondersoekbeampte. Aanvanklik net een moord, en kolonel Sauls, takbevelvoerder van moord-en-roof, het gemeen dis tyd dat sy bevel neem van ’n ondersoek, dat sy gereed is om haar eerste saak te vat en op te los. Niemand kon voorsien dat daardie een moord net die begin was nie, dat sy byna self ’n slagoffer sou word nie, ’n stukkie statistiek.

“Obsessie kan jou gemoed oorvat,” sê Silas. “Laat ons eers die ding met die kis uitsorteer. Laat ons dit stap vir stap vat, elke stap logies deurdink en deurpraat. Laat die kop regeer, nie die hart nie.”

“Hy’t my lewe gespaar. Hoekom? Dit sou maklik gewees het, vinnig …”

“Jy bepraat dit tog met jou traumaberader, Ella.”

Wanneer hulle alleen is, is sy “Ella”, nie “adjudant” nie. Wanneer hy haar in hulle private ruimte “Ella” noem, stribbel sy nie teë nie, rig sy geen skanse op nie, is hy soos ’n pa wat met sy dogter praat. Sy lê diep in die sitplek, half skuins sodat sy sy gesig in profiel kan sien, nou in die skemerte van die aand met skaduwees oor die groewe en kontoere van sy wange en ken en nek.

“Om dood te maak, is nie wat hom dryf nie, kolonel. Dis bysaak. Hy oes die velle. Hy’s agter die velle aan.”

“En toe hy joune nie kon kry nie, was daar geen rede om jou lewe te neem nie. Is dit wat jy sê?”

“Hy sou niks bereik deur my dood te maak nie. Hy wou ’n stuk van my maagvel hê. Om wat mee te maak? Wat’s die betekenis van die velle?”

“Hy’t jou lewe nie gespaar uit ’n gevoel van skielike deernis nie. Hy’t jou nie skielik jammer gekry nie. Hy’s onderbreek. As hy nie onderbreek is nie …”

Sy weet wat hy wil sê, waarom hy sy sin kortknip, dit in die lug laat hang. Sy wéét wat met Abel se vierde slagoffer gebeur het, die een wat haar lewe in daardie huis kom red het, wat die Nagsluiper onderbreek het terwyl hy besig was om haar maagvel te oes. Bam.

Silas ry by die terrein van die provinsiale hospitaal in, agterom na die laboratoriumgebou van forensiese patologie, half eenkant, kroongrond van dokter Koster.

“Ek wil haar sien,” sê Ella.

“Is jy seker?” vra Silas toe hulle uitklim.

“Sy’s deel van Abel. Hulle is onlosmaaklik, Abel en sy ma. Sy’t my die eerste keer na hom toe gelei.”

“Uit haar graf uit.”

“Sy kan my ’n tweede keer help.”

“Eers wanneer jou siekverlof verby is, wanneer die trauma-berader jou afgeteken het.”

Hulle stap in. In die lang, stil gang na dokter Koster se kantoor hang ’n onmiskenbare reuk. Nie die medisynereuk van hospitaalgange nie, maar van ontbinding, van sterk reukweerders en reinigers, ondertone van chloor en formaldehied en Dettol.

Nie ’n opheffende werksomgewing nie, maar hier het Ella Abel se eerste twee slagoffers leer ken. Hier, nakend en weerloos op die vlekvryestaal-outopsietafel, praat die liggame met dokter Koster. Hier vertel hulle wat met hulle gebeur het, vorm ’n beeld van hul noodlottige ontmoeting met die dood.

Hier het Ella kom kyk na Mia Vermooten, die ambisieuse hoogvlieër, die Nagsluiper se eerste slagoffer. En daarna die hupse Emma Adams.

“Waar’s die kis?” vra dokter Koster.

Aan sy oorjas is bruin smeersels en vlekke, droë bloed, of dalk koffie, vermoed Ella. Sy ouderdom is onpeilbaar, grys stoppels aan gesigvore, bruin pigmentvlekke op sy voorkop en rugkante van sy hande. Aan die stompkant van die sestigs, miskien al sewentig, sou sy skat.

“Tee sal lekker wees,” sê Silas, “terwyl ons op die menere Poppe wag.”

Dokter Koster sit die ketel aan. Ella kyk hoe hy ’n skeppie koffie in ’n beker gooi. Hy onthou, dink sy met genoegdoening, dat sy nie tee drink nie.

Die derde slagoffer, die joernalis, het sy ook hier by dokter Koster kom besoek. Dit was vir haar erger om af te kyk op iemand op die outopsietafel wat sy in lewe geken het. Sy kon sy stem nog hoor, die knipper van sy oë sien, al het hy daar gelê sonder gesig, van sy kopvel gestroop.

“Wat gaan julle met haar doen?” vra dokter Koster. “As ons klaar is met haar kis.”

Silas haal sy skouers op. “Terug in haar graf in. Wat anders?”

“Sy sal ’n nuwe kis nodig hê. Julle kan haar g’n in die ou vrot kis gaan terugplant nie.”

“Ek sal ’n rekwisisie aanvra vir ’n kis. Dennehout met touhand-vatsels. Poppe & Son kan haar weer gaan begrawe.”

Die Nagsluiper se vierde slagoffer het Ella nie op dokter Koster se tafel gesien nie. Hom het sy beter geken as die joernalis. Báie beter geken, intiem geken. Sy was nog in ICU toe dokter Koster die regsgeneeskundige ondersoek op Bam afgehandel het. Sy was kritiek; daar is gevrees vir sepsis waar Abel met sy ongesteriliseerde lem aan haar buik gesny het.

Sy het wel Bam se begrafnis in Wespark bygewoon, in ’n rolstoel, vol antibiotika en sterk verdowing teen die pyn. Agterna summier terug hospitaalbed toe.

Dokter Koster kyk op, hoor ook die lawaai by die diensingang. “Hulle’s hier.”

Poppe & Son se kistrollie kom teen die effense vloerhelling in. Die rubberwieletjies met die aardige vrag girts oor die skoon teëlvloer na die outopsievertrek, stamp die swaaideure oop. Die hidrouliese springvere laat hulle geluidloos vanself toeswaai.

“Dankie. Los die kis net so op die trollie,” sê dokter Koster. “Ek sal bel as julle haar kan kom haal.”

“Hoe lank gaan dit vat?” vra meneer Poppe Senior.

“Nie lank nie.”

“Ons is besig, ons het môre ’n begrafnis.”

“Sy’s nie haastig nie. Oormôre, die dag daarna …”

Ná die menere Poppe vertrek het, verskyn die lykhuisdiener met ’n klouhamer en groot skroewedraaier. Ella wonder momenteel waar dié gereedskap so vinnig opgediep is.

Die skroewe is vasgeroes, maar die hout verrot, klam en vol rooi modder, en die kis gaan nie hergebruik word nie. Dit neem die assistent net enkele minute om die deksel los te breek. Hy lig dit weg om die inhoud te ontbloot.