Читать книгу Sêgoed met slaankrag - George Claassen - Страница 11

Op die tafel lê die skamel beursie

van ’n hardwerkende vrou

en op hom sit ’n mot.

Ek weet nie wat hy van ekonomie

af weet nie maar ek dink

die wete wat hom gestuur het

om verskoning daarvoor te vra is God.

SHEILA CUSSONS, digter, “Die beursie”, Die sagte sprong, 1979

Gewoond aan ontbering in elke vorm, onverskillig vir hitte of koue, ru grootgebring in die onmaatskaplikste bandeloosheid, is die rus vir daardie Afrikanerkind ’n verlossing uit die groot hartseer van sy klein lewe . . . Vreemde toestande het hom en sy huisgesin afgestoot langs die hange wat opklim uit die moerasse van die armblankedom.

JOCHEM VAN BRUGGEN, skrywer, Ampie: Die natuurkind, 1924

Naby, onder die hoogte, lig ’n voordorpie hom uit die newels uit. Verpotte sinkkamertjies en met blik toegelapte huisies, langs mekaar geplak, is ’n broeiplek van ons armblanke.

JOCHEM VAN BRUGGEN, Ampie: Die natuurkind, 1924

Meester, ons boere raak klaar. Die regering moet ons help.

JOCHEM VAN BRUGGEN, ibid.

’n Volk red homself.

J.D. (VADER) KESTELL, kerkleier, in ’n oproep in die 1930’s om arm Afrikaners deur ’n reddingsdaad op te hef

. . . die kommando van die sukkelaars . . .

C.M. VAN DEN HEEVER, skrywer en digter, oor die armblankes wat van die plase na die stede getrek het, Gister, 1941

Ons hele swart bevolking is ontwortel. Hulle is geproletariseer, verarm en gedemoraliseer. Die tot nou toe klein minderheid wat ’n mate van onderwys gekry het, word werkgeleenthede en effektiewe burger- en politieke regte ontsê. Hulle gevolglike bitterheid voorspel niks goeds vir toekomstige verhoudings tussen swart en wit nie.

DONALD MOLTENO, politikus, 1946

Dit behoort nooit te gebeur dat die woede van die armes die vinger van beskuldiging word wat na almal van ons gewys word omdat ons nie op die krete van die mense vir voedsel, vir skuiling, vir die waardigheid van die individu gereageer het nie.

NELSON MANDELA,

eerste president van ’n demokratiese Suid-Afrika (1994–1999)

In hierdie eeu bly miljoene van die mense in die wêreld se armste lande gevangenes, slawe en in kettings. Hulle is vasgevang in die tronk van armoede. Dit is tyd om hulle vry te laat.

NELSON MANDELA,

Trafalgar-plein, Londen, 3 Februarie 2005

Ons leiers moet pasop vir die sirenesang van weelde,

reuse-herehuise en groot motors, terwyl die meeste van ons mense steeds in liederlikheid leef.

DESMOND TUTU, geestelike leier en Nobelpryswenner,

met verwysing na die ANC-regering wat in 1994 aan bewind gekom het

’n Risiko om enigiets te besit: ’n motor, ’n paar skoene, ’n pakkie sigarette. Nie genoeg om te versprei nie, nie genoeg motors, skoene, sigarette nie. Te veel mense, te min dinge. Wat daar is, moet gesirkuleer word sodat elkeen die kans kan hê om vir ’n dag gelukkig te wees.

J.M. COETZEE, skrywer en Nobelpryswenner, Disgrace, 1999

Elke dag, en gedurende elke uur van ons tyd wanneer ons nie slaap nie, gee die duiwels ingeburger in ons samelewing ons met ritmiese en hipnotiese gereeldheid die raad, ‘word ryk, word ryk, word ryk’.

THABO MBEKI,

Suid-Afrikaanse president, tydens die NELSON MANDELA-gedenklesing, Johannesburg, 2006

Ek het nog nooit gehoor van wittes wat behoeftig is nie.

THABANG MAKWETLA, adjunkminister van verdediging en militêre veterane, tydens ’n debat in die Nasionale Vergadering oor die voorgestelde Wet op Militêre Veterane, 16 Augustus 2012, aangehaal in Die Burger