Читать книгу Stil punt van die aarde - Johann de Lange - Страница 18

And the ports have names for the sea

W.H. Auden

optelgedig uit Op ’n eiland van Karel Schoeman

Dit is ’n lang reis van Piréus

na die eiland. Die skip is oud

& lendelam, sukkel traag

van hawe na hawe, vertoef

soms terwyl die son neerbrand,

totdat die fluit weer blaas

& die reis voortgesit word.

Hawens, stadjies, eilande dryf verby,

blou bergkamme teen die lug,

vensters flits boodskappe terug.

Daar is eilande

deur geen mens bereik,

wit strande deur geen voet betree,

helder fonteine waarvan niemand

ooit gedrink het nie.

Daar is streke

op geen kaart vasgelê, kuste

waaraan nooit ’n naam gegee is nie,

waar geen oor die roep van voëls

of die slag van branders hoor nie,

afstande ongemeet

& dieptes ongepeil –

o ja, daar is eilande,

& dit is ’n lang reis

van die eiland na jou.