Читать книгу Änfach frei laafe geloss - Josef Peil - Страница 27

En Brutsch

Sinn sich de Karl unn de Kurt uff de Gass begehnt.

»No«, mähnt de Karl, »dou ziehst jo en Brutsch. Geht’s der nitt gut?«

»Eich war beim Zahndokter«, hot de Kurt gejawwelt. »Eich honn vielleicht ebbes mitgemach. Drei Stunn honn eich uff em Stuhl gehuckt, unn als de Kopp zerick unn es Maul uffhalle.«

»Konnst de nitt emoh …?«, wollt de Karl wisse, awer de Kurt war so im Geduns.

»Vielleicht en Veertelstun in de ganze Zeit, wo ich richtig sitze konnt. Mer dut awei noch es Gnick weh devun unn Muskelkater honn ich in de Kinnbacke.«

»No jo, wenn …«, hot’s de Karl noch emoh proweert.

»Also, das däre eich mer niemeh mache losse. Das Schleife, das is dorch unn dorch gang. Awer das war noch nitt emoh das Schlimmste. Die ganz Zeit so do hucke, do kannst de verrickt were.« Unn do musst de Kurt doch emoh Luft hule.

Unn do hot de Karl en gefroht: »Sah moh: Was war dann nou schlimmer: Maul uffhalle ore Maul halle?«