Читать книгу Änfach frei laafe geloss - Josef Peil - Страница 35

Grand ohne drei

Gleich wie er die Kart uffgeroff hot, hot de Gähle Adam gesiehn, das Spiel musst er hoch reize. Wenn er ’s tät laafe losse, konnt er nor verleere. Die drei stärkste Bauere honn em gefehlt, awer en Karospiel war das mit de Pik-As debei ohne Kreiz unn Herz.

Wie das gepasst hot, grad harre se noch die Red devun gehatt. Drei Kinner harr-er, unn alle drei ware se fort, de ältst Bu beim Opel, de anner noch weirer fort uff eme Schiff, unn die Toochter in Kulenz mit eme Beamte verheirat. So war er mit seiner Änni allän im Haus geblieb.

Awer das Autofahre is em in letzter Zeit immer schwerer gefall. Unn fahre musst er, Geschäft war käns im Dorf.

»Achtzeh«, de Ewald war am Sahn, »zwanzig, zwo, drei«, do musst er passe. Awer de Kurt is hochgang. Bei 40 hot de Adam noch emoh iewerlaacht, sollt er ’s riskeere?

Die Toochter war domit komm, se wollte baue. Unn wenn die Alte ehr Häisje verkaafe, mit baue unn dann die zwei Enkelcher verwahre täre, dass die Toochter mit könnt schaffe gehn, dann wär doch for all gesoricht, harre se gemänt.

Er hot hien unn her iewerlaacht, mit Karo unn Pik war er stark, sollt er Hand spiele?

Es hot em hart uffgang, ma hot’s gesiehn.

Er hatt jo noch viel in das Haus ningestoch in de letzte Johr, Bad unn Heizung ingebaut, de Fußborem unn die Deere nou, die Decke verkläd unn vertäfelt. Ma hot kaum meh gesiehn, dass es en alt Haus war. Dreihunnerttausend, harr er gemänt, müsst er dofor kriehe könne.

De Adam hot dem Kurt mitgehall, awer de Kurt hatt aach en gut Blaat.

»Achtenveerzich«, das war de Punkt, alles ore nix.

Was war em dann anneres iewerich geblieb, als wie alles uff die Toochter ze setze unn das Haus ze verkaafe. Die Rente war nitt so arich, unn zwanzigtausend immer noch ze bezahle. Wenn er das Häisje hätt könne gut los were. Se harre angefang ze baue, ware schun bal fertich.

Unn awei musst er die Sach dorchziehe, zurück is nimmee gang.

»Die honn eich aach noch«, saht de Adam, unn domit harr er das Spiel. Wenn awei in de Blinne en Bauer leihe tät. Rechene konnt er domit jo nitt. Dass dann awer nor zwei Lusche drin ware, wo er gleich lei’e losse konnt, das hot em nitt so gut geschmeckt.

Grad so wenich wie dass er noch käner gefunn hatt, de em aach nor hunnertachtzigtausend genn hätt. Es ware noch drei annere Häiser fäl im Dorf. Die junge Leit, falls se iewerhaupt geblieb sinn, harre entwere kä Geld ore selwer nou gebaut. Unn die Fremme, wo sich so Dinger leiste, die honn die groß Auswahl unn könne die Preise drücke.

»Eich muss Grand spiele«, saht de Adam, unn de Kurt do druf ganz drucke: »Eich wäß das, awer vum-mer kriehst de Contra.«

Dann hot de Kurt de Herzbauer uffgespielt unn dem Adam domit gleich de änziche Trump rausgezoh. Dorch en Fehler vum Ewald kam de Adam wiere ins Spiel unn hot e paar gure Stich gemach.

Er hatt die Aue mitgeziehlt, unn beim Nohziehle am Schluss sinn’s aach nitt meh wor.

»60«, saht de Kurt, »us langt das«, unn de Adam wusst, dass er froh wär, wenn er wie bei dem Spiel am Enn die Hälft kräächt.

De Kurt hot die Karte zesammegeroff: »Dou bist am Genn!«

Awer de Adam hatt kä Luste meh, for annere die Karte ze mische. »Eich mah nimmee, eich gehn häm«, sahr-er.

»Bleib doch noch e bisje«, saht de Ewald unn hot das Thema angefang. Die Froh musst jo komme, wo de Adam Ängst devor hatt: »Unn wann ziehst de fort?«

Do is de Adam weerklich uffgestann, unn im Fortgehn sahr-er: »Am liebste gar nitt.«

Domit war das aach so: Die Hälft gewunn, for ihne war das verlor.