Читать книгу АСАРЛАР (II жилд) - - Страница 78

Сенинг даргоҳингда кўзларимда нам,

Энди аён менга ул борар жойим.

Кечиргил отамнинг гуноҳларини,

Онамга умр бер ўзинг, Худойим.

Мен улуғ ҳикматни англадим чоғи,

Йиллаб қонлар этиб кўнгилларимни.

Ўзинг омон сақла, асрагил ўзинг,

Кузги райҳонлардек сингилларимни.

Не зотлар юз буриб келиб кетгайлар,

Не мурод ҳосилдир менинг дардимдан?

Ўзинг паноҳингга олгил мулкимни,

Ўзинг юз ўгирма элим, юртимдан.

Дунёда энг олий Сўз ўзингдирсан,

Ўзинг бир гап солдинг балки дилимга.

Худойим, қирқ эшик очилмоқдадир,

Худойим, ёруғ қил сўзни тилимга.