Читать книгу Staan in die algemeen nader aan vensters - Loftus Marais - Страница 14

o, sarah se voete dirigeer op die maat van mozart

soos sy sit op die muur van die opelugteater

hierdie voete, effe stink, dui alles in kaalte aan

die tone krul en strek, die brug lig en sak

en die pianis moet volg, dan sag, dan hard

selfs, o sarah, gee jy ritme aan die somer se krieke

ook die aandverkeer en die vliegtuie oorhoofs

kyk, dit maak sin, beslis, dat daar op die maan

voetspore is, en dat komponiste heroïese musieke

oor achilles en oedipus tot jou eer sal komponeer

my sarah, gaan toer die sale van europa met jou voete

die duurste pedikure vir jou, asook refleksioloë

in manelpakke, in die agtergrondskemer

sonates oor die naelmaantjies van jou tone

en ’n virtuoos bloos by ’n rokflits van jou enkels

nee, sarah, nee wag, dit alles is te ver, te vol fantasie

jou voete hier voor my weet van vratte en skimmel

en die geklop van stap, tog steeds dui hulle aan

hoe die note die aandlug moet tint, jou voete gebied:

daar is iets stewiger en meer ritmies as musiek