Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 46

Авызың тулы кан…

Бу җирдә

Диюләр теш коеп көн күрә…

Сытып чыгар ирен читеннән,

Вәләкин телеңне,

Кан, диеп, телеңне,

Ялгышып телеңне төкермә!

Син үргә менгәндә, язмышың

Аз типтеме аска, аз атты?

Бер генә егылып борының канаттың…

Бер генә җуела азатлык!

Аннары тиешле наныңны

Теләнеп сорарсың үләттән.

Тик кара таракан төшкәндәй ашыңа,

Төшәчәк дәвамнар каһәре башыңа —

Бел генә:

Бер генә,

Нибары бер генә,

Бер генә югала дәүләт тә!

Ут төпле иләктән, туктаусыз,

Ил арты илләрне иләтеп,

Юата астыртын елмайган җәлладың:

– Җайладым!

Нибары бер генә,

Бер генә үләчәк милләтең!

Авызың тулы кан…

Бу җирдә

Диюләр теш коеп көн күрә…

Сытып чыгар ирен читеннән,

Вәләкин телеңне,

Кан, диеп, телеңне,

Ялгышып телеңне төкермә! —

Исән-сау котылгач,

Иң соңгы орышта

Очрашып күзгә-күз, бергә-бер, —

Хөрлеккә мәдхия җырларга,

Хөрлеккә мәдхия җырларга,

Җырларга кирәгер!