Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 61

алар бии таңга кадәр болыннарда.

сокланасың: менә ләса – яшьлек үзе!

алар елый, яшеренеп үләннәргә —

үзләредәй яшел күзле, яшел күзле.

алар көлә – кыңгыраулы үзән буйлап

уйнап кына йөгерек җил узганмыни!

алар китә, артларыннан эз калдырмый,

берәүгә дә үч сакламый, кызгандырмый.

алар көтә – айга, елга сузыламы,

сузыламы бер гасырга, аннан ары…

алар кача кешеләрдән ераккарак,

сизә калса сүзләрендә ялган барын.

алар белә: югалсалар – ахыр булыр.

төсләре дә онытылыр, үзләре дә.

дөнья биер, шашып-шашып, үз көенә,

бик иске дәрт күмерләнер күзләрендә.

…бераз кырку тоелыр ул август төне:

нәкъ ирек һәм җуелмаган хәтер төсле.

һәм оза-а-ак чык кипми торыр үләннәрдә,

кемнедер бик хәтерләтеп – яшел күзле.