Читать книгу Vleiswond - Johann de Lange - Страница 7

Drie dae oud het hul die kind

op ’n houtkruis vasgebind

met lappe, die kaal lyf

wat later die skyf

sou word van soveel spot,

en aan ’n dorstige hout sou bot,

deur die naeltjie leeg-

gebloei, hom nougeset verpleeg

deur die eerste paar uur

toe hy fel pyn moes verduur.

Die besmette bloed

wat ’n hart moes voed

sypel deur pype in ’n donker fles

– so is eindelik sy dors geles.

En in dié tenger lyf

soos op ’n lei, herskryf

die bloed opnuut:

laat U wil geskied.