Читать книгу ТАНЛАНГАН АСАРЛАР - - Страница 89

У бир оддий қувноқ сураткаш,

У билади, яхши билади:

Бир кун чоллар – хаёли чалкаш,

Суратини сўраб келади.

Ёшлигини излаб келади

Бир вақт гўзал саналган қизлар.

У билади, яхши билади:

Қор остида қолмиш ул излар.

“Биз ёш эдик, ўт юрак, барно,

Сен суратга олган онингда.

Ҳуснимизнинг муҳри бордир, о,

Танҳо сенинг ғаладонингда.

Кулмоқдасан, ё келдикми кеч,

Нега бунча ўжарсан, саркаш?”

Ҳазиллашиб, бўй бермайди ҳеч

Ёшлик деган қувноқ сураткаш.