Читать книгу АСАРЛАР (I жилд) - - Страница 21

Туним менинг – жунуним менинг,

Сочлари ёйилган қуюним менинг.

У тинмай шивирлар – юзлари олов:

Энди осон бўлар қийиним менинг.

Қўлларим лолдирлар елкаларида,

Илк бор туғён қилар тинимим менинг.

Илк бор томирларим тор келар қонга,

Илк бор торлик қилар кийимим менинг.

Нима бўлса бўлди!

Сочилиб кетар

Китобга асраган тийиним менинг.

Дунё ғойиб бўлар,

Қолар оқбадан

Туним менинг – қайиним менинг.

Ўсмирлигим менинг, не чирой кўрдинг?

Қаро сочларини мисли сой кўрдинг.

Ўсмирлигим менинг, ў шумим менинг,

Билмадим, ўнгмиди ё тушим менинг –

Лол эдим, ол эдим, безавол эдим,

Рўй берди энг телба жунуним менинг.

У-чи, шивирларди – юзлари олов:

– Жиннигинам менинг,

Мажнуним менинг!