Читать книгу Sürgün - - Страница 48

Qalx özündən yuxarı, canın cəhənnəm olsun,

azadlığın ordadır – güclərin arasında,

Qoy günahın göy qədər, qoy savabın kəm olsun,

Çürüyub ovxalanma bürclərin arasında.

Orda yuyulmuş yaxan, orda köynəyin təmiz,

Gözlərin də dupduru, qaynasın bulaq kimi,

Ləkə götürmür günəş, sudan bulanmır dəniz,

Qalx, görün dalğa-dalğa uzaqlardan dağ kimi.

Savaşlar bir sınaqmış, sorulmaz bədənindən,

Nə dava məqsədimiz, nə sülh günahımızdır.

Bir gün də qürbətlərə yol çıxar vətənindən,

Azadlıq son dərdimiz, həm də son ahımızdır.

Ayaqlarından çəkib, basacaqlar başından,

Nədir anlayacaqsan, nəymiş bu yazı, qədər,

Yox ayrı müharibə, ayrı eşq savaşından,

Qalx özündən yuxarı qalxa bildiyin qədər.