Читать книгу Agaat - Marlene van Niekerk - Страница 4

“Hierdie nuwe bundel wil die volksiel se wasdom, drang en sy uitbreiding vertolk. Mag die ondefinieerbare element – die krag en geur van die Suiderland se bloed en bodem – tasbaar hierin gevind en deurvoel word, dan sal die volk dit aan die hart druk en dit as sy eie aanneem.”

Uit die Inleiding tot die eerste uitgawe van die FAK-Volksangbundel.

H. Gutsche, WJ. du P. Erlank, S.H. Eyssen (reds.). Firma J. H. De Bussy Pretoria, HAUM. V/H Jacques Dusseau & Co, Kaapstad, 1937.

“Dit is die mooie, die waardevolle van hierdie boek: dat dit uit liefde gebore is en tot liefde inspireer, daaraan kan niemand twyfel nie. En daarmee word ’n groot diens gelewer aan die volk, want wie vir skoonheid voel, op watter gebied ook al, het ’n bydrae te lewer tot die kulturele ontwikkeling van die volk.

Die gebied wat in dié boek betree word, is ’n spesifiek vroulike en dra daardeur by tot die verfyning en verfraaiing van die huislike atmosfeer. So ’n atmosfeer onderskei die kultuurbewuste volk van die onbeskaafde.”

Uit die Voorwoord deur mev. E. (Betsie) Verwoerd tot Borduur só deur Hetsie van Wyk, Afrikaanse Pers-boekhandel, Johannesburg, 1966.

“Hierdie Hulpboek … dien as ’n sleutel vir die ontsluiting van die skatkamers van klimaat, grond, lewende hawe en bemarkings potensialiteite op elkeen van die 93,000 plase van ons land.

Net soos die Bybel die pad wys tot geestelike volmaaktheid so sal hierdie Hulpboek ook op middels en maniere wys tot meer winsgewende boerdery en tot groter welvaart vir elke boer in elke deel van die land.

Ek sal graag wil sien dat hierdie Hulpboek sy weg tot elke boerewoning vind en in besit kom van elke persoon wat boer of belangstel in landbousake, omdat dit ’n ryke myn is van nuttige informasie.”

Uit die Voorwoord deur Sy Edele generaal J.G.C. Kemp, Minister van Landbou, tot die Hulpboek vir boere in Suid-Afrika. Geskryf deur staatsamptenare en ander deskundiges, Staatsdrukker, Pretoria, 1929.