Читать книгу Яңа гасыр тавышы / Голос нового века (на татарском языке) - Антология, Питер Хёг - Страница 101

Авылыма кайтып барам әле, —

Урамнарга асфальт түшәлгән;

Кайберәүләр бакчасында һаман

Чыга алмый йөри түтәлдән.

Олы юлның мосафирын дәшеп,

Мәчет манарасы утлары

Балкып тора эңгер төшкән чакта,

Утлап йөри Фәһим тулпары.

Авыл кырыенда зират. Тынлык.

Агачларны шактый кискәннәр…

Яңа каберлекләр калкып тора,

Дога кылып уза исәннәр.

Кибет арты. Карт буйдаклар тора

Эшсезлектән, шунда чүмәшеп;

Су буеннан казлар кайтып бара,

Эш майтарган кебек, гүләшеп.

Тезелешеп утырыша йортлар:

Кайсы агач аның, кайсы таш,

Кайсы капкаларга йозак элгән,

Кайсы өйдә пешә тәмле аш…

Түбән очтан көтү кайтып килә,

Этләр өрә иң бай йортларда.

Мал башы да шактый сирәгәйгән,

Арткан бушап калган йортлар да…

Авылыма кайтып киләм әле.

Сагындым бит, авылым, сагындым!

Тыкрык саен урый-урый кайтам

Сукмакларын бала чагымның.