Читать книгу Каеннар сары иде - Хәсән Туфан - Страница 67

Мәрәкәйнең – җитмеш китап!

Ә Дәрдемәнднең… – бер генә…

«Бер»дә – мәңгелек; җитмештә –

Бер еллык гомер генә.

Азмы кәгазь киткән моңа?

Азмы акча – гонорар?

Бусы әле матди чыгым,

Бусы аның вак зарар.

Бу чыгымны ил кесәсе –

Ил иңе бар – күтәрә.

Иң зарарлы ягы аның

Малда түгел, бүтәндә.

Иң хәерсез ягы моның

Матди түгел, мәгънәви;

Укучының зәүкын, хисен

Җилгә суыра, жәлләми.