Читать книгу ТАНЛАНГАН АСАРЛАР - - Страница 70

Вазнига нисбатан неча бор вазмин

Юкни уясига судрар чумоли.

Шумикин ризқ-рўзи, яшашдан мазмун,

Чумоличасига шумикин толе?

Заҳматкаш қумурсқа, Инсон умри ҳам

Юклар ташимоқдан иборат, асли,

Бизда ўзга мезон ва ўзга кўлам;

Ахир, биз инсонмиз, одамзод насли.

Чумоли, сен учун англамоқ мушкул

Бизлар ташийдиган юклар кўламин,

Муқаддас юкимиз – кураш, ҳижрон, гул,

Тепадаги юлдуз, бахши ўлани…

Шоир ҳам маънолар ташиб юради,

Икки елкасида сўз тўла хуржун.

Бўшатади, яна сўзлар теради,

Қайта бошдан уни тўлдирмак учун.

Ризқ билан тўлсин деб, бўлсин деб пойдор, —

Инсоният отли буюк хонадон,

Вазнига нисбатан вазмин неча бор

Юк ташиб йўл босар тинмагур Инсон.