Читать книгу Звездный дар. Сборник стихов / Урмала савгъат - - Страница 23

Кьакьурби душкили дучибти хяса

Чедаира гьачам игули цIали,

Челкьулри дурхIнани кагъурти ила,

ЦIа тIякьярбикIулри ва ахъбикIулри.

Хапли наб тIем бакIиб игуси кьацIла,

Къагъсиван цIаличи ну гъамриубра,

Баркабан хIунтIен кьацI игулри цIали,

ДурхIя игусиван ну цIумрухъунра.

Чис лебсив авара игуси кьацIла,

Адамла агарти, ламус, уркIецIи,

Чинар лертив илди бемжурси цIала?

Белкъунтани кьацIла балусив багьа?

Гьандикиб дунъякад къунздухъун гаши,

Бушкай кьакьурбиван ушкули шими,

Дергълизив алхунси ургъан гьаникиб,

БерхIили верцIибси хъубзар гьаникиб.

Сепайда илдази бурахъес илаб,

Сепайда ил кьацIла кесекла багьа.

Адамла дурхIяван цIализибадли

Алкунти някъбани кьацI дурайсулра.

Ва зубри, хIушара ил балагьличи

Паргъатли хIердикIес сен дирутирав,

Белкъунтала нясси баркьудиличи,

Дунъя, марли хIура кьабулбикилрив?